ქვეშეთი-კობის გზის პროექტი არის ძალიან ხარჯიანი და სამხედრო თვალსაზრისით, ძალიან რისკიანი, - ამის შესახებ ფრაქცია „ნაციონალურო მოძრაობის" თავმჯდომარე რომან გოცირიძემ ჟურნალისტებს განუცხადა.
მისი ინფორმაციით, ამ პროექტის განხორციელება 515 მლნ დოლარი ჯდება. გოცირიძის შეფასებით, არაადეკვატურია ღატაკი ქვეყნისათვის გიგანტური ოდენობის რესურსების ჩაყრა იმისათვის, რომ სომხეთსა და რუსეთს შორის მანქანებმა იარონ.
„გუდაურთან გზა არის 23 კმ. სიგრძის. აქედან მისი ნახევარი არის გვირაბები. მათ შორის ერთი გვირაბი 9კმ-იანი სიგრძისაა. ყველაფერი ეს 515 მილიონი დოლარი ჯდება. ეს არის იმ რაოდენობის თანხა, რაც ანაკლიის პროექტის პირველ სტადიას სჭირდება. აბსოლუტურად არაადეკვატურია ღატაკი ქვეყნისათვის გიგანტური ოდენობის რესურსების ჩაყრა იმისათვის, რომ სომხეთსა და რუსეთს შორის მანქანებმა იარონ. ეს პროექტი არის ძალიან ხარჯიანი და სამხედრო თვალსაზრისით, ძალიან რისკიანი. ვიდრე რუსეთი მტრული სახელმწიფოა, ვიდრე დიპლომატიური ურთიერთობა არ გვაქვს და ფაქტობრივად საომარ მდგომარეობაში ვართ, ვიდრე რუსეთი დემოკრატიული სახელმწიფო არ გახდება, ყველა რისკს დათვლა უნდა, როგორც ფინანსურს, ასევე სამხედროსა და პოლიტიკურს.
ძალიან გულუბრყვილოა იმის თქმა, რომ სამხედრო შეტევისთვის რუსეთს გზა არ სჭირდება და ჰაერიდან პარაშუტებით ჩამოფრინდებიან. აგვისტოს ომის დროს რა როლი ითამაშა იმ გზამ, საიდანაც ტანკები შემოვიდნენ, ძალიან კარგად ვნახეთ,"- განაცხადა რომან გოცირიძემ.