მოძრაობა „შეცვალეს“ აქტივისტებმა საქართველოში ევროკავშირის წარმომადგენლობასთან აქცია-პერფორმანსი გამართეს.

მათ დასავლელი პარტნიორებისგან ბიძინა ივანიშვილისთვის სანქციების დაწესება და მის მფლობელობაში არსებული ქონების დაყადაღება მოითხოვეს.

როგორც მოძრაობა „შეცვალეს" ერთ-ერთმა აქტივისტმა გიორგი კუპატაძემ „ინტერპრესნიუსთან" საუბრისას განაცხადა, ქართული დემოკრატიისთვის გადამწყვეტია, რომ ივანიშვილი ჩამოშორდეს ხელისუფლებას.

„მოძრაობა „შეცვალე" დღეს ევროკავშირის წარმომადგენლობასთან შეიკრიბა იმისთვის, რომ ბიძინა ივანიშვილისთვის სანქციების დაწესებას მივაღწიოთ. მთავარი არის ის, რომ ეს ადამიანი არის რუსეთის მეფისნაცვალი საქართველოში და ქართული დემოკრატიისთვის გადამწყვეტია, რომ ეს ადამიანი ძალიან მალე წავიდეს ქვეყნიდან და ხელისუფლებას ჩამოშორდეს. შესაბამისად, მოძრაობა „შეცვალე" ყველაფერს გააკეთებს იმისთვის, რომ ჩვენმა პარტნიორებმა, ჩვენმა დასავლელმა მეგობრებმა, სანქციები დაუწესონ ბიძინა ივანიშვილს და სწორედ ამ სანქციების დაწესებით და მისთვის ფინანსური პრობლემების შექმნით მივაღწევთ გამარჯვებას და მაქსიმალურად სწრაფად ჩამოვაშორებთ ბიძინა ივანიშვილს ხელისუფლებას",-განაცხადა გიორგი კუპატაძემ.