ყველა საკვანძო საკითხში „ქართულმა ოცნებამ“ ანტირეკორდი მოხსნა. „ქართული ოცნება“ არის განწირული, - ამის შესახებ „ევროპული საქართველოს“ ერთ-ერთმა ლიდერმა გიგი უგულავამ NDI-ის კვლევის შედეგების შეფასებისას განაცხადა.

მისი თქმით, მმართველ გუნდს ძალიან დიდი ძალისხმევა დასჭირდება, რომ ქვეყანა პოზიტიური ძვრისკენ წაიყვანოს, რაც „თითქმის შეუძლებელია“.

„უკიდურესი ბრიყვი უნდა იყო, როდესაც რაღაც არ მოგწონს, სარკეს ამტვრევდე. როდესაც სარკეში ჩაიხედები და შენი თავი არ მოგეწონება, შენ თავში უნდა იპოვო პრობლემები და არა სარკე ამტვრიო. ასე მოსდის „ქართულ ოცნებას“ უკვე მეშვიდე წელია. ისინი ლანძღავენ ხან NDI-ის, ხან IRI-ის და ყველა საერთაშორისო ორგანიზაციას, რომელიც მათ მრუდე სახეს ანახებს სარკეში.

რაც შეეხება თვითონ შინაარს, კატასტროფაა ეს „ქართული ოცნებისთვის“, ყველა საკვანძო საკითხში „ქართულმა ოცნებამ“ მოხსნა ანტირეკორდი. აქვს თუ არა „ქართულ ოცნებას“ ზრდის პერსპექტივა? მე ამ კვლევის მიხედვით გეტყვით, რომ - არა. იმიტომ რომ ყველაზე მყარი, რაც, სამწუხაროდ, ჩვენს ქვეყანას ეხება, ნეგატიურისკენ მიდის, ეს არის ქვეყნის განვითარება, რომელიც, როგორც წესი, ემთხვევა ხოლმე მმართველი პარტიის რეიტინგს. სწორედ ამიტომაც არის, ქვეყნის განვითარებას დადებითად დაახლოებით 20% აფასებს და ასევე დაახლოებით 20%-ია „ქართული ოცნების“ რეიტინგიც. შესაბამისად, ძალიან დიდი ძალისხმევა დასჭირდება „ქართულ ოცნებას“, რომ პოზიტიური ძვრისკენ წაიყვანოს. ეს თითქმის შეუძლებელია, იმ პოლიტიკურ ვითარებაში, რა პოლიტიკურ ვითარებაშიც „ქართულმა ოცნებამ“ და პირადად ბიძინა ივანიშვილის ხუშტურებმა და შიშმა შეიყვანეს ქვეყანა, ამიტომ „ქართული ოცნება“ არის განწირული.

რაც შეეხება არსებულ ციფრებს, თუ ავიღებთ „ქართულ ოცნებას“ თავის სატელიტ „პატრიოტთა ალიანსით“ და აქეთ ავიღებთ ყველა ოპოზიციურ პარტიას, ვინც დღეს ერთობით ვფიქრობთ რომ დავამარცხოთ „ქართული ოცნება“ არის ციფრები 34/24-ზე ოპოზიციის სასარგებლოდ“,- განაცხადა უგულავამ.