დეპუტატ ანრი ოხანაშვილის საქმეზე ბრალდებულ ვახტანგ რობაქიძის განცხადებით, მას ალკოტესტის ჩაბარების დროს პოლიციის თანამშრომელმა ფიზიკური შეურაცხყოფა მიაყენა იმის გამო, რომ სასურველი შედეგი ვერ მიიღო. როგორც რობაქიძემ ჟურნალისტებს სახელმწიფო ინსპექტორის სამსახურში შესვლამდე განუცხადა, გამოძიებისა და სასამართლო პროცესის დროს მისი უფლებები დარღვეული იყო.
„ალკოტესტის ჩაბარების დროს, ვერ მოხერხდა შესაბამისი შკალების შევსება და თითქოს ამისგან გაღიზიანებული პიროვნება ადგა, მუცლის არეში მუშტი დამარტყა და დავეცი ტახტზე. ამის შესახებ სასწრაფო დახმარებასაც ვუთხარი. ჩემი უფლებები იყო სრულიად დარღვეული, გამოძიების დროსაც, სასამართლოს დროსაც. ანუ ეს არის ერთი სტრუქტურა დარღვეულია ყველაფერი", - განაცხადა ვახტანგ რობაქიძემ.
რობაქიძის თქმით, ის ყველა ხერხს მიმართავს, რომ საზოგადოებამ სიმართლე გაიგოს.
„მე მაქსიმალურად უნდა ვეცადო, რომ ეს ყველაფერი საზოგადოებამ გაიგოს. აქ არ არის საუბარი ჩემს პიროვნებასთან დაკავშირებით. ეს შეიძლება ხვალ განმეორდეს, ხშირია ასეთი ფაქტები ჩვენს ქვეყანაში. ანრი ოხანაშვილმა გასვლისას მომაძახა, რომ მე შენ გაჩვენებ მე ვინ ვარ და რას გაგიკეთებო, ეს დამიფიქსირა და მან მე 6 დღე ფაქტობრივად მაწამა საკანში. უჭმელი ვიჯექი 6 დღის განმავლობაში",- განაცხადა რობაქიძემ.