რუსეთის უშიშროების საბჭოს მდივნის მოადგილე დიმიტრი მედვედევი აცხადებს, რომ რუსეთი ანტარქტიდის კონტინენტის შესწავლის მიმართულებით წამყვან ადგილს იკავებს და არ შეიძლება მან ლიდერი პოზიციები დაკარგოს.
მედვედევის თქმით, სწორედ ამ საკითხზე ესაუბრა ის რუს მეცნიერებს. მედვედევის განცხადებით, რუსეთი ანტარქტიდაზე საექსპედიციო ინფრასტრუქტურის მოდერნიზაციას აგრძელებს.
მედვედევის ინფორმაციით, უკვე მიმდინარეობს სამუშაოები ახალი ზამთრის კომპლექსის შესაქმნელად, ხოლო 2021 წელს იგეგმება რუსული ბაზების რეკონსტრუქცია, რომლებიც მუდმივმოქმედი სამეცნიერო სადგურები იქნება. განსაკუთრებული ყურადღება კი სპეციალისტების მომზადებას დაეთმობა.
„ეს ყველაფერი მოწმობს, რომ რუსეთს სტრატეგიული ინტერესები აქვს ანტარქტიდაზე და მზად არის სრულფასოვანი თანამშრომლობისთვის ამ საკითხით დაინტერესებულ ყველა სახელმწიფოსთან“, - განაცხადა მედვედევმა.