თებერვალში, ოკუპირებულ „სამხრეთ ოსეთში“ რუსი დეპუტატების სამუშაო ჯგუფის ჩასვლა იგეგმება, რომელიც ოსების გენოციდის აღიარების საკითხზე მუშაობს. „სპუტნიკის“ ინფორმაციით, ამის შესახებ დუმის დეპუტატმა ვიკტორ ვოდოლაცკიმ განაცხადა.
„მუშაობაში ჩავრთეთ ექსპერტები, ისტორიკოსები ისტორიის ინსტიტუტისა და მეცნიერებათა აკადემიიდან, ასევე, სახელმწიფო არქივიდან. ჩვენ ჩავატარეთ სხდომა, რომელზეც დავამტკიცეთ სამუშაო გეგმა, განვსაზღვრეთ პირები, რომლებიც ექსპერტებთან ერთად იმუშავებენ სხვადასხვა მიმართულებით და შეაგროვებენ მასალებს წყაროებიდან. მას შემდეგ, რაც თითოეული წევრი მომაწვდის ინფორმაციას, რომ მზად იქნება სამხრეთ ოსეთის დეპუტატებთან დიალოგისთვის, განვსაზღვრავთ ცხინვალში ჩასვლის თარიღს“, - განაცხადა ვოდოლაცკიმ.
სააგენტოს ინფორმაციით, რუსეთის სახელმწიფო დუმაში მოქმედებს კომისია საქართველოს ხელისუფლების მიერ 1920 წელს ოსების გენოციდის აღიარებასთან დაკავშირებით. კომისიას დსთ-ს საკითხთა კომიტეტის თავმჯდომარის მოადგილე ვიკტორ ვოდოლაცკი ხელმძღვანელობს.