კონსერვატიული პარტიის თავმჯდომარის ზვიად ძიძიგურის განცხადებით, NDI და IRI საქართველოში წლების განმავლობაში პოლიტიკური დემოკრატიის განვითარების საკითხებზე მუშაობს.
მისივე თქმით, კონსერვატიული პარტია ემიჯნება იმ ანტიამერიკულ განწყობებს, რომელიც გარკვეულ პოლიტიკურ პარტიებში არსებობს.
„ამერიკული საერთაშორისო ორგანიზაციები NDI და IRI ორ ათეულ წელზე მეტია მუშაობენ საქართველოში პოლიტიკური დემოკრატიის განვითარების საკითხებზე. IRI -სთან კონსერვატიულ პარტიას თანამშრომლობის მრავალწლიანი გამოცდილება აქვს. დღესაც ინტენსიური ურთიერთობის ფორმატში ვიმყოფებით და მიგვაჩნია, რომ პარტიული სტრუქტურების, პარტიების დემოკრატიული განვითარების საქმეში ამ ორგანიზაციას მნიშვნელოვანი როლი აქვს შესრულებული. ასევე ვემიჯნებით იმ ანტიამერიკულ განწყობებს, რომელიც ჩვენს ქვეყანაში შეინიშნება პოლიტიკური სპექტრის გარკვეულ ნაწილში. საკმარისია, ჩვენმა სტრატეგიულმა პარტნიორმა - აშშ-მ თავისი საერთაშორისო მხარდაჭერა შეასუსტოს საქართველოს მიმართ ძნელი წარმოსადგენი არ არის რა სირთულეების წინაშე აღმოვჩნდებით. ამიტომაც, პრაგმატული თვალსაზრისითაც სასიცოცხლოდ მნიშვნელოვანია ჩვენს სტრატეგიულ პარტნიორთან გვქონდეს ადეკვატური ურთიერთობა როგორც პოლიტიკურ, ასევე ეკონომიკურ ჭრილში”, - განაცხადა ზვიად ძიძიგურმა.