გამოცემა The Hill იანუსზ ბუგაჯსკის სტატიას აქვეყნებს, სადაც მკვლევარი ახლო აღმოსავლეთში და ევრაზიის რეგიონში მიმდინარე დაძაბული მოვლენების ფონზე, საქართველოს მნიშვნელობაზე საუბრობს. ავტორის თქმით, აშშ-ს სჭირდება ისეთი სანდო მოკავშირე, როგორიც საქართველოა, რომელიც რეგიონის უსაფრთხოებისთვის მნიშვნელოვან კონტრიბუციას იღებს. ავტორის მიხედვით, ქართველ მაღალჩინოსანთა ვიზიტები ამერიკაში, მათ შორის გაზაფხულზე პრემიერ გახარიას მიერ დაგეგმილი შეხვედრები ვაშინგტონში ხაზს გაუსვამს ქვეყნის მნიშვნელოვან წვლილს აშშ-ის საგარეო პოლიტიკაში.

მკვლევარი რეგიონში რუსულ აგრესიაზეც საუბრობს და აცხადებს, რომ მისი მოქმედებები საფრთხეს უქმნის ნატო-ს წევრ ქვეყნებს, ენერგოუსაფრთხოებასა და ემუქრება ნატო-ს ასპირანტი ქვეყნების, საქართველოს და უკრაინის უსაფრთხოებას.

„ნატო-ს ზოგიერთი დედაქალაქი შეშფოთებულია, რომ საქართველოს გაწევრიანება ნატო-ში გამოიწვევს რუსეთთან ომს საქართველოს ტერიტორიის ოკუპაციის გამო. ისინი უგულებელყოფენ იმ უმთავრეს პრინციპს, რომ მესამე მხარეს არ აქვს ვეტოს უფლება ნატო-ს გადაწყვეტილებებზე და ვერ შეძლებს რომელიმე ასპირანტის მძევლად აყვანას. მეტიც, რუსეთი არ გარისკავს უშუალო დაპირისპირებას უფრო მძლავრ სამხედრო მრავალეროვნულ ორგანიზაციასთან და თავად ნატო გახდება შემაკავებელი ფაქტორი განახლებული კონფლიქტისთვის, როგორც ეს ბალტიისპირეთის ქვეყნებში მოხდა“,- წერს ბუგაჯსკი.

ავტორი საქართველოს მიერ საერთაშორისო მისიებში განხორციელებულ კონტრიბუციაზე საუბრობს და აცხადებს, რომ ქვეყანაში საპარლამენტო დემოკრატიაა და იგი უმნიშვნელოვანესი რეგიონული მოთამაშეა, რომელიც „უფრო მეტი დახმარებით, შეძლებს უკეთესად დაიცვას თავი რუსული აგრესიისგან, გააძლიეროს საკუთარი დემოკრატია და უფრო მაღალ დონეზე აიყვანოს ამერიკის რეგიონული მოკავშირეობა“.