რეგიონული განვითარების სამინისტრო - მსოფლიო ბანკი ინფრასტრუქტურული პროექტების მიმართულებით 2019 წლის შედეგებს დადებითად აფასებს

საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი, მოადგილეებთან ერთად, მსოფლიო ბანკის წარმომადგენლებს შეხვდა. დელეგაციას მსოფლიო ბანკის ტრანსპორტის სექტორის მენეჯერი კარლა გონზალეს კარვაჯალი ხელმძღვანელობს. ამის შესახებ „ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს.

უწყების ცნობით, მხარეებმა სატრანსპორტო სფეროში მსოფლიო ბანკის დაფინანსებით განხორციელებული და მიმდინარე პროექტები განიხილეს. დელეგაციის წევრებმა დადებითად შეაფასეს 2019 წლის შედეგები.

საუბარი შეეხო ზემო ოსიაური-ჩუმათელეთის გზის ხაშურის შემოვლით მონაკვეთს, რომლის გახსნა წელს ზაფხულში იგეგმება. მხარეებმა ასევე განიხილეს რეგიონული მნიშვნელობის გზების დაფინანსების შესაძლებლობები.