ოკუპირებულ ტერიტორიაზე 3 თვის წინ დაშავებულმა თამარ გიგაურმა ახალგორი დღეს დატოვა

ოკუპირებულ ახალგორში მცხოვრებმა 67 წლის თამარ გიგაურმა, რომელიც ახალგორში დაახლოებით 3 თვის წინ დაშავდა, დე ფაქტო რეჟიმის კონტროლირებადი ტერიტორია დღეს დატოვა.

დაშავებული პედაგოგის ახლობლების არაერთგზის თხოვნის და საქართველოს ცენტრალური ხელისუფლების წარმომადგენლების მოწოდების მიუხედავად, დე ფაქტო რეჟიმის წარმომადგენლები გიგაურს სამი თვის განმავლობაში საშუალებას არ აძლევდნენ, რომ სამედიცინო სერვისი საქართველოს ცენტრალური ხელისუფლების მიერ კონტროლირებად ტერიტორიაზე მიეღო.

„თამარ გიგაურმა, რომელმაც ახალგორში სხეულის დაზიანება გასული წლის ნოემბრის დასაწყისში მიიღო, მხოლოდ დღეს შეძლო, რომ საოკუპაციო ძალების მიერ კონტროლირებადი ტერიტორია დაეტოვებინა. გიგაური უკვე იმყოფება ცენტრალური ხელისუფლების მიერ კონტროლირებად ტერიტორიაზე და შესაბამისი სამედიცინო სერვისით ისარგებლებს. არაერთგზის მიმართვის მიუხედავად, რომ დე ფაქტო რეჟიმის წარმომადგენლებს ესარგებლათ ჰუმანიტარული პრინციპით და გიგაურის ჯანმრთელობისთვის საფრთხე არ შეექმნათ, სამწუხაროდ, ამ დრომდე ვერ მოხერხდა, რომ დაშავებულს კვალიფიციური სამედიცინო დახმარება მიეღო. მას შემდეგ, რაც თამარ გიგაურს შესაბამისი კვლევები ჩაუტარდება და ჯანმრთელობის მდგომარეობა გაუუმჯობესდება, გეგმავს, რომ კვლავ დაბრუნდეს ახალგორში“, - განაცხადა ,,ინტერპრესნიუსთან“ საუბრისას ახალგორის მუნიციპალიტეტის გამგებელმა ნუგზარ თინიკაშვილმა.

თამარ გიგაური გასული წლის 3 ნოემბერს ახალგორში, დაახლოებით 7 მეტრი სიღრმის ჭაში ჩავარდა და სხეულის მრავლობითი დაზიანება მიიღო. დაშავებული ახალგორისა და ცხინვალის საავადმყოფოებში იყო მოთავსებული, თუმცა, მისი ჯანმრთელობის მდგომარეობა კვლავ არასტაბილურია.

დე ფაქტო რეჟიმის წარმომადგენლებმა ახალგორის შესასვლელი გასული წლის 5 სექტემბერს ჩაკეტეს და 24 იანვარს დროებით, 6 თებერვლამდე გახსნეს.

ლადო პაპავა - საქართველოში სტაბილურად არასტაბილური ვითარება მხოლოდ რუსეთის ინტერესებშია
ქართული პრესის მიმოხილვა 22.02.2020
ვიქტორ ყიფიანი - ევროკავშირი საქართველოს  რეგიონში მთავარ პარტნიორად მიიჩნევს და აღნიშნავს, რომ საქართველო სრულადაა ჩართული „აღმოსავლეთ პარტნიორობის“  მრავალმხრიან  არქიტექტურაში