ლიეტუვის საგარეო საქმეთა მინისტრი, ლინას ლინკევიჩუსი „ევროპული საქართველოს“ ერთ-ერთი ლიდერის, გიგი უგულავას დაკავების გამო შეშფოთებას გამოთქვამს.
„შეშფოთებული ვარ სასამართლოს განაჩენით, რომელიც მან „ევროპული საქართველოს“ ერთ-ერთი ლიდერის, გიგი უგულავას წინააღმდეგ გამოიტანა. სასამართლო სისტემა არ უნდა იყოს გამოყენებული ოპოზიციის დევნისთვის.
მოახლოებული საპარლამენტო არჩევნები ლაკმუსის ქაღალდი იქნება საქართველოს დემოკრატიისთვის“, - წერს ლინკევიჩუსი „ტვიტერის“ საკუთარ გვერდზე.
შეგახსენებთ, უზენაესმა სასამართლომ გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 3 წლით და 2 თვით პატიმრობა განუსაზღვრა.