ქართული პრესის მიმოხილვა 18.02.2020
ახალგორი ქართველების გარეშე - "პროცესი მიდის ახალგორის დაცლისკენ, რომ იქ ქართველები საერთოდ არ დარჩნენ”
ვისზე გააკეთებს ფსონს დასავლეთი წინასაარჩევნოდ
***
ახალგორი ქართველების გარეშე - "პროცესი მიდის ახალგორის დაცლისკენ, რომ იქ ქართველები საერთოდ არ დარჩნენ”
"ოკუპირებულ ცხინვალის რეგიონში, ქართველ მოსახლეობაში მშობლიური ენა აქტიურად იდევნება. დე ფაქტო შინაგან საქმეთა სამინისტრომ აფთიაქებს ჩამოართვა წამლები ქართული წარწერებით. ამასთან, ოკუპირებული ახალგორის ტერიტორიაზე მცხოვრებლებს მშობლიურ ენაზე სწავლის უფლებას უზღუდავენ. ამის შესახებ ინფორმაციას "დემოკრატიის კვლევის ინსტიტუტი" ავრცელებს. ამას ემატება ის გარემოებაც, რომ უკანასკნელ პერიოდში, ახალგორში ორი ქართული სკოლის დირექტორი თანამდებობიდან გაათავისუფლეს”, - წერს გაზეთი "რეზონანსი“ სტატიაში სათაურით, ახალგორი ქართველების გარეშე - "პროცესი მიდის ახალგორის დაცლისკენ, რომ იქ ქართველები საერთოდ არ დარჩნენ"
"სააგენტო "რესმა" დე ფაქტო სამინისტროს პრესსამსახურზე დაყრდნობით 17 თებერვალს დაწერა, რომ „ეკონომიკურ დანაშაულთან ბრძოლის სამმართველოს" თანამშრომლებმა ორ აფთიაქში აღმოაჩინეს და ჩამოართვეს სამედიცინო პრეპარატები ქართული წარწერებით. ინფორმაციაში მითითებულია სულ მცირე ექვსი დასახელების პრეპარატი, მათ შორის - "კოლხური". აქვე უნდა ითქვას, რომ ოკუპირებულ ცხინვალის რეგიონში ქართული წარმოების პროდუქციის, მათ შორის, სამედიცინო პრეპარატების გაყიდვა აკრძალულია დე ფაქტო მთავრობის სპეციალური დადგენილებით. რაც შეეხება ოკუპირებულ ტერიტორიებზე მშობლიურ ენაზე განათლების მიღების უფლების შეზღუდვას, "დემოკრატიის კვლევის ინსტიტუტი" მიიჩნევს, რომ საქართველოს ხელისუფლებამ ეს საკითხი უნდა დააყენოს ყველა საერთაშორისო შეხვედრაზე და უზრუნველყოს აღნიშნული საკითხის განხილვა, როგორც ჟენევის საერთაშორისო დისკუსიების ფორმატში, ისე ინციდენტების პრევენციისა და მათზე რეაგირების მექანიზმის ფარგლებში. ამასთანავე, გამოიყენოს სამართლებრივი მექანიზმები, მათ შორის, ადამიანის უფლებათა ევროპული სასამართლოსთვის მიმართვის შესაძლებლობა", - აღნიშნავს გამოცემა.
"შერიგებისა და სამოქალაქო თანასწორობის ყოფილი სახელმწიფო მინისტრი პაატა ზაქარეიშვილი „რეზონანსთან" ამბობს, რომ ოკუპირებულ "სამხრეთ ოსეთში" დექართველიზაციის პროცესი მიდის და მისი ლოგიკური გაგრძელება საქართველოსთვის საკმაოდ არასასიამოვნო იქნება. თუმცა, ზაქარეიშვილი გამორიცხავს იმას, რომ რუსეთმა ოკუპირებული ტერიტორიების მიერთება გადაწყვიტოს, რადგან არალეგალურ საქმიანობას ასეთ ვითარებაში უფრო მშვიდად გააგრძელებს. „რუსეთს ოკუპირებული ტერიტორიის შეერთება რომ სდომოდა, აქამდე გააკეთებდა, თუმცა, დექართველიზაცია რომ მიდის, ფაქტია. პროცესს აშკარად ახალგორის დაცლისაკენ მივყავართ, რომ იქ ქართველები საერთოდ არ დარჩნენ. "აშკარა იყო, რომ მათ ჰქონდა იმედი სიტუაცია ქართულ-ოსური დიალოგისაკენ დაიძვრებოდა, თუმცა, უკვე ამდენი წელი გავიდა და ეს არ მოხდა. შემდეგი ამოცანაა, რომ მოხდეს ამ ტერიტორიების დაცლა ქართული მოსახლეობისაგან, - პროცესის სწორედ აქეთ მიდის”, - განაგრძობს გამოცემა.
"დექართველიზაციის პროცესს (რუსები) არ დააჩქარებენ, ბუნებრივ პროცესში ჩაეწერებათ, რომ მათკენ ვერ მოხდეს თითის გაშვერა. რუსეთს ათასჯერ ურჩევნია ეს რეგიონები დისტანციურად მართოს. შავი ხვრელებივითაა, - სადაც არცერთი ქვეყნის იურისდიქცია არ ვრცელდება, იქ შეუძლია იარაღიც შეიტანოს. "სამხრეთ ოსეთი" რუსეთის შემადგენლობაში რომ იყოს, აუცილებლად გაკონტროლდება რა იარაღი და რაკეტები აქვთ, ვინ ცხოვრობს, რა საბანკო ურთიერთობებია და ა.შ. ყველაფერი უნდა იყოს გამჭირვალე და საერთაშორისო სამართლის შესაბამისად. "სამხრეთ ოსეთიდან" დონბასში რუსული ფული გაედინება, ამას შემდეგ ვეღარ გააკეთებენ. ამიტომ, აწყობთ ასე, როდესაც ასეთი არალეგიტიმურია. რომ უნდოდეს მის შემდგენლობაში შეყვანა, ამას აქამდე გააკეთებდა. აფხაზეთისგან განსხვავებით "სამხრეთ ოსეთში" ძალიან იოლია ჩაატაროს ე.წ. უკანონო, ვითომდა რეფერენდუმი, როგორც ყირიმში ჩაატარეს. ამას არ აკეთებენ, რადგან ასეთი არალეგიტიმურობა და ჰაერში გამოკიდული ვითარება, მათ ახალ, დამატებით შესაძლებლობებს აძლევს. მიერთებით, ჰომოგენური გახდება, ჩრდილოეთ კავკასიის ერთ-ერთი ნაწილი იქნება, სადაც უფრო მეტი პასუხისმგებლობა რუსეთს დაეკისრება. ახლა თავისუფალია, უამრავ შავბნელ საქმიანობას ახორციელებს," - განაცხადა ზაქარეიშვილმა”, - წერს სტატიის ავტორი.
ვისზე გააკეთებს ფსონს დასავლეთი წინასაარჩევნოდ
“დასავლეთის მხრიდან კრიტიკული შენიშვნები არ წყდება, სადაც საუბარია სამართლიანი არჩევნების უზრუნველყოფასა და დემოკრატიის კურსის შენარჩუნებაზე. ამას ემატება ამერიკელი კონგრესმენების კრიტიკული წერილების ახალი სერია. ანალიტიკურ წრეებში აქტიურად მიდის საუბარი დასავლეთის მხრიდან რომელიმე ოპოზიციური პარტიის მხარდაჭერაზე, რაც არჩევნების შემდეგ უკვე სხვა სახეს მიიღებს. ყველაფერი დამოკიდებული იქნება იმაზე, საპარლამენტო არჩევნებს დასავლეთი რამდენად ლეგიტიმურად ცნობს”, - წერს გაზეთი "რეზონანსი“ სტატიაში სათაურით, ვისზე გააკეთებს ფსონს დასავლეთი წინასაარჩევნოდ / "დამოკიდებულია იმაზე, რომელი პოლიტიკური ძალა დაარწმუნებს, რომ ის იქნება მისი ინტერესების შეუვალი გამტარებელი“
"დემოკრატიული კურსიდან გადახვევა," "გადახრა ავტორიტარიზმისკენ" და "გადაკვეთილი წითელი ხაზები," - ექსპრეზიდენტი გიორგი მარგველაშვილი აქტიურ პოლიტიკურ ცხოვრებას უბრუნდება. ამის შესახებ ყოფილმა პრეზიდენტმა „ტვიტერზე" დაწერა. ანალიტიკოსთა ერთი ნაწილი თვლის, რომ გიორგი მარგველაშვილი სავარაუდოდ "ლელო საქართველოსთვის" ერთ-ერთი ლიდერი გახდება, რომელიც პარტიას რეიტინგსა და იმიჯს აუმაღლებს, თუმცა, მეორე ნაწილი მის "ლელოში" გაწევრიანების ფაქტს სკეპტიკურად უყურებს, რადგან კითხვის ნიშნის ქვეშ დგას, პოლიტიკური გაერთიანება რამდენად მიიღებს ექსპრეზიდენტს. თავად გიორგი მარგველაშვილი მზად არის ითანამშრომლოს ნებისმიერ პოლიტიკურ გაერთიანებასთან. მისი განცხადებით, მზად არის ექსპრეზიდენტ მიხეილ სააკაშვილსაც ესაუბროს, თუკი ამ უკანასკნელს დემოკრატიის გაძლიერებასთან დაკავშირებით ხედვა აქვს. მარგველაშვილმა "მთავარ არხს" განუცხადა, რომ პოლიტიკურ ოპოზიციასთან კონსულტაციებს იწყებს და სურს გაერთიანებულ ოპოზიციას დაეხმაროს”, - აღნიშნავს გამოცემა.
"ანალიტიკოსმა ვახტანგ ძაბირაძემ „რეზონანსთან" საუბრისას თქვა, რომ დასავლეთი აქცენტს არ გააკეთებს რომელიმე პოლიტიკურ გაერთიანებაზე და საპარლამენტო არჩევნებამდე „ქართული ოცნების" წინააღმდეგ რადიკალურ ზომებს არ მიიღებს. მისივე თქმით, ყველაფერი დამოკიდებულია იმაზე, არჩევნებს დასავლეთი რამდენად ლეგიტიმურად ცნობს. რაც შეეხება მარგველაშვილის პოლიტიკაში დაბრუნებას, მისი აზრით, ექსპრეზიდენტი „ლელოს" შეუერთდება. “არ მგონია, რომ მიზანმიმართულად რომელიმე ოპოზიციურ პარტიაზე გაკეთდეს აქცენტი დასავლეთის მხრიდან. ზოგადად იქნება ოპოზიციაზე ლაპარაკი და ამასთან იმაზე, არჩევნები ნორმალურად ჩატარდეს. ქვეყანაში უმძიმესი ვითარებაა შექმნილი, თუმცა, მიუხედავად ამისა, არ ველოდები, რომ არჩევნებამდე დასავლეთი გადამჭრელ და მკვეთრ ზომებს მიიღებს „ქართული ოცნების" წინააღმდეგ. ეს საარჩევნო სისტემა რომც დარჩეს, ყველაფერი დამოკიდებული იქნება იმაზე, თუ რამდენად კანონიერად ჩატარდება არჩევნები. ასე რომ, ამ შემთხვევაში დასავლეთი უფრო იქნება გარანტი იმისა, რომ არჩევნები ჩატარდეს კანონიერების ფარგლებში, ყოველგვარი გაყალბების გარეშე, ვიდრე რომელიმე პოლიტიკურ პარტიაზე გააკეთოს აქცენტირება. დასავლეთში მშვენივრად იციან, რომ საქართველოში ერთპარტიულობა ყოველთვის კატასტროფის მომტანია. ისინი რომელიმე ცალკე აღებულ პარტიას არ დაუჭერენ მხარს. ზოგადად მისცემენ შეფასებას, თუ რა მოხდება არჩევნების დროს”, - განაგრძობს გამოცემა.
"რაც შეეხება მარგველაშვილს, თუკი ის პოლიტიკაში დაბრუნდება, „ლელო"ყველაზე ახლოს მდგომი მგონია მის მსოფლმხედველობასთან. ამასთან, პრაქტიკულად მთელი მისი ადმინისტრაცია, ვინც პოლიტიკაში დაიწყო მოღვაწეობა, „ლელოში" გადაბარგდა და სრულიად ბუნებრივი იქნება, რომ ისიც „ლელოს" მიმართულებით წავიდეს. მარგველაშვილს, ცალკე აღებულს და თუნდაც კვირიკაშვილთან ერთად, არ აქვს იმის პოლიტიკური და ფინანსური კაპიტალი, რომ ცალკე დამოუკიდებელი ორგანიზაცია შექმნან. ისინი, ერთად თუ ცალცალკე, ნებისმიერ პოლიტიკურ ორგანიზაციას გააძლიერებენ და გარკვეულ ელექტორატს, „ქართულ ოცნებაზე" განაწყენებულს, თავისკენ წაიყვანენ. თუ, ვინმე ელოდება იმას, რომ მარგველაშვილის პოლიტიკაში დაბრუნებით არსებული პოლიტიკური ბალანსი კატასტროფულად შეიცვლება, ასე არაა, მაგრამ იმ პარტიისთვის და ორგანიზაციისთვის, სადაც მივა, მნიშვნელოვანი შენაძენი იქნება," - განაცხადა ვახტანგ ძაბირაძემ”, - დასძენს გამოცემა.
"ანალიტიკოსი ზაალ ანჯაფარიძე მარგველაშვილის „ლელოსთან" გაერთიანების შესაძლებლობას სკეპტიკურად უყურებს და აღნიშნავს, რომ ექსპრეზიდენტი საკუთარ შესაძლებლობებს გადაჭარბებულად აფასებს. რაც შეეხება დასავლეთის მხრიდან რომელიმე ოპოზიციური პარტიის მხარდაჭერას, თქვა, რომ ყველაფერი დამოკიდებულია წინააარჩევნო პერიოდზე. მისივე თქმით, ერთი მხრივ დასავლეთი, მეორე მხრივ ჩრდილოვანი ქვეყანა რუსეთი, საქართველოს თავისკენ ექაჩება. დასავლეთის პოზიცია მნიშვენლოვანია და სწორედ ამიტომაც ქირაობს ხელისუფლება და ოპოზიცია ვაშინგტონში ლობისტურ კომპანიებს. უცნაური განცხადებაა, რადგან არცთუ ისე დიდი ხნის წინ მარგველაშვილი ამბობდა, რომ სწორედ ის იყო სააკაშვილთან მებრძოლი პოლიტიკური ძალების ავანგარდში. პოლიტიკაში რაღაც წესები, ეტიკეტი და მორალური ზღვრები ხომ უნდა არსებობდეს? - როდესაც აცხადებ, რომ შენ ითანამშრომლებ მასთან, ვისაც შენ საჯარო გამოსვლებში უარყოფით კონტექსტში მოიხსენიებ, ამომრჩევლისთვის და საზოგადოებისთვის გაუგებარია. გასაგებია, რომ მას სურს ერთგვარი შემკვრელის როლი შეასრულოს სხვადასხვა პროდასავლურ ძალებთან, მაგრამ რამდენად გამოუვა? - ცოტა გადაჭარბებულად აფასებ საკუთარ შესაძლებლობებს. „ლელოში"ლიდერები მგონი საკმარისი რაოდენობით შეიკრიბნენ. მარგველაშვილი თუ იქ მივა, რა სტატუსით უნდა მივიდეს? გახდეს „ლელოს" ლიდერი თუ პოლიტსაბჭოს რიგითი წევრი? - "ლელოში" ლიდერთა პოზიციები უკვე გადანაწილებულია”, - წერს გამოცემა.
"მას ალბათ უფრო მაღალი ამბიციები აქვს და რამდენად მოხერხდება მისი „ლელოში" გაწევრიანება ისე, რომ მისი ამბიციები დაკმაყოფილდეს, გაუგებარია. ალბათ „ლელოს" წევრებმაც უნდა გამოთქვან სურვილი, სურთ მათ მარგველაშვილის მიღება? - გამომდინარე იქიდან, რომ საზოგადოების საკმაოდ ანგარიშგასაწევი ნაწილის დამოკიდებულება მისი ფიგურის მიმართ დადებითი არ არის. ყველაფერი დამოკიდებული იქნება იმაზე, თუ როგორ განვითარდება წინასაარჩევნო დიმანიკა. საქართველო, რომელიც გადაქცეულია დასავლეთსა და რუსეთს შორის სტრატეგიული კონკურენციის ერთ-ერთ ველად, ყველა დაინტერესებულია იმით, ხელისუფლებაში არ მოვიდეს ის პოლიტიკური ძალა, რომელიც მის ინტერესებს ამ ქვეყანში დააზიანებდა. ვისზე გააკეთებს ფსონს დასავლეთი დამოკიდებულია იმაზე, თუ რომელი პოლიტიკური ძალა დაარწმუნებს უკეთ იმაში, რომ ის იქნება მისი ინტერესების მყარი, შეუვალი და თანმიმდევრული გამტარებელი. ამიტომაც არის ეს შეჯიბრი ერთი მხრივ "ქართული ოცნების" და მეორე მხრივ "ნაციონალური მოძრაობისა" და "ევროპული საქართველოსი," - ვინ უფრო მეტ მხარდაჭერას მოიპოვებს. ამიტომაც არის ლობისტური კომპანიების მეშვეობით დასავლეთში ზეგავლენის მოხდენის მცდელობა სასურველი მიმართულებით. სამწუხაროა, რომ ჩვენი პოლიტიკური კულტურა ასეთ დონეზე დავიდა, რომ საშინაო პოლიტიკური მიზნების მისაღწევად ჩვენი პოლიტიკური მოთამაშეები მხარდაჭერას გარედან ეძებენ. ზოგი მოსკოვში, ზოგი სად და ზოგი სად," - განუცხადა ანჯაფარიძემ „რეზონანსს.", - წერს სტატიის ავტორი.
