შეშფოთებული ვართ იდლიბში, თურქეთის სამხედრო ძალებზე ასადის რეჟიმის მიერ განხორციელებული თავდასხმით, - ამის შესახებ საქართველოს საგარეო საქმეთა მინისტრის მოადგილემ, ალექსანდრე ხვთისიაშვილმა განაცხადა, რომელიც საქართველოში თურქეთის რესპუბლიკის საელჩოს საქმეთა დროებით რწმუნებულს ონურ სევინს შეხვდა.

როგორც „ინტერპრესნიუსს“ საგარეო საქმეთა სამინისტროდან აცნობეს, უწყებაში გამართულ შეხვედრაზე მხარეებმა სირიის პროვინცია იდლიბში არსებული ვითარება განიხილეს.

თურქეთის მხარემ მინისტრის მოადგილეს ინფორმაცია მიაწოდა განვითარებულ მოვლენებზე, რომელთა შედეგად იერიში იქნა მიტანილი რეგიონში განლაგებული თურქეთის შეიარაღებული ძალების სამონიტორინგო პუნქტის მიმართ.

ალექსანდრე ხვთისიაშვილმა თურქეთის წარმომადგენელს სტრატეგიული პარტნიორის - თურქეთის რესპუბლიკის მიმართ საქართველოს მხარდაჭერა დაუდასტურა, დაგმო ძალადობრივი იერიში თურქეთის სამხედრო ძალების წინააღმდეგ და მწუხარება თურქეთის ჯარისკაცების დაღუპვის ფაქტთან დაკავშირებით გამოხატა.

„საქართველო ყურადღებით აკვირდება სირიაში მიმდინარე ბოლო განვითარებებს. თურქეთი არის საქართველოს სტრატეგიული პარტნიორი და მეგობარი, შეშფოთებული ვართ იდლიბში თურქეთის სამხედრო ძალებზე ასადის რეჟიმის მიერ განხორციელებული თავდასხმით. დღევანდელ შეხვედრაზე დეტალურად განვიხილეთ იდლიბში მომხდარი თავდასხმის დეტალები. საქართველო მხარს უჭერს ჩვენს სტრატეგიულ პარტნიორს თურქეთს, მწუხარებას ვუცხადებთ დაღუპულთა ოჯახებს და მთლიანად თურქ ხალხს, მსგავსი თავდასხმები ასადის რეჟიმის და მისი მოკავშირეების მხრიდან უნდა შეწყდეს“, - განაცხადა ალექსანდრე ხვთისიაშვილმა.

მხარეებმა გამოხატეს იმედი საერთაშორისო თანამეგობრობის უფრო აქტიურ ჩართულობაზე სირიაში მიმდინარე მოვლენებთან დაკავშირებით, რის შედეგად შესაძლებელი გახდება ვითარების დეესკალაცია.