ოკუპირებული აფხაზეთის ე.წ. პრეზიდენტობის კანდიდატი ასლან ბჟანია, დღეს, კრასნოდარის საავადმყოფოში, კიდევ ერთ ე.წ. საპრეზიდენტო კანდიდატს ადგურ არძინბას შეხვდა.

შეხვედრის შესახებ ინფორმაცია ბჟანიას საარჩევნო შტაბის ხელმძღვანელმა, ალექსანდრე ანქვაბმა დაადასტურა, თუმცა შეხვედრის დეტალებზე არაფერს ამბობს. „როგორც კი დეტალები გვეცოდინება, მოგაწვდით“, - განუცხადა მან „სპუტნიკ-აფხაზიას“.

ამასთან, როგორც ბჟანიას საარჩევნო შტაბის ხელმძღვანელის მოადგილე ლეონიდ ლაკერბაიამ განაცხადა, ასლან ბჟანიას ჯანმრთელობის მდგომარეობა უმჯობესდება.

ე.წ. პრეზიდენტობის კანდიდატი ასლან ბჟანია ინტოქსიკაციის ნიშნებით სოჭის კლინიკაში 2 მარტს მოათავსეს. მისი მდგომარეობა მძიმე იყო და ის მედიკამენტოზურ კომაში ჰყავდათ. მოგვიანებით ის კრასნოდარის საავადმყოფოში გადაიყვანეს.