ოკუპირებული აფხაზეთის ტერიტორიაზე ტყის ხანძრები მძვინვარებს. რადიო „სპუტნიკთან" საუბარში აფხაზეთის საგანგებო სიტუაციების დე ფაქტო მინისტრმა ლევ კვიცინიამ განაცხადა, რომ ხანძარი ოთხ რაიონშია.
„ვითარება რთულია. ოთხ რაიონში იწვის ტყე. ოჩამჩირის რაიონში ხანძარი საცხოვრებელ სახლებს მიუახლოვდა. ამ დროისთვის ცეცხლი ლოკალიზებულია. თუმცა, იმის თქმა, რომ ყველაფერი კონტროლდება, ძნელია, რადგან აქ ვაქრობთ, სხვა ადგილას ისევ აჩენენ ხანძარს. ხანძრის მიზეზები ადამიანურ ფაქტორებს უკავშირდება. ადამიანები თესვისთვის ემზადებიან, ალაგებენ ნაკვეთებს, რის შედეგადაც ჩნდება ხანძრები“, - აცხადებს კვიცინია.
აფხაზეთში ტყის ხანძრები 2019 წლის ნოემბერშიც გაჩნდა, რა დროსაც 11 ათასი ჰექტარი დაიწვა. აფხაზებმა დასახმარებლად მაშინ რუსეთს მიმართეს.