ევროპელი პოლიტიკოსები აშშ-ის პრეზიდენტის, დონალდ ტრამპის გადაწყვეტილებაზე, შენგენის ზონის ქვეყნებთან შეზღუდვების დაწესების თაობაზე კომენტარს აკეთებენ.

ტრამპის გადაწყვეტილებას ფინეთის ყოფილი პრემიერი, ალექსანდერ სტაბი გამოეხმაურა და მას უპასუხისმგებლო უწოდა.

„მისასალმებელია ნებისმიერი მცდელობა, რომ შეჩერდეს კორონავირუსის აფეთქება, მაგრამ დონალდ ტრამპის გადაწყვეტილება, რომ გამორიცხოს ბრიტანეთი აკრძალულთა სიიდან სხვა არაფერია თუ არა უპასუხისმგებლობა. ვირუსები საზღვრებს არ ცნობენ. გადაწყვეტილებები ფაქტებზე უნდა იყოს დაფუძნებული და არა პოლიტიკაზე“,-წერს სტაბი.

ევროკავშირის საბჭოს პრეზიდენტის, ჩარლზ მიშელის თქმით, ევროკავშირი „მდგომარეობას შეაფასებს“.

„აკრძალვასთან დაკავშირებით, რომელიც დონალდ ტრამპმა დააწესა, ჩვენ ვითარებას შევაფასებთ. ეკონომიკური რღვევა თავიდან უნდა ავიცილოთ. ევროპა ყველა ზომას იღებს, რომ კორონავირუსის გავრცელება შეაჩეროს“,-წერს მიშელი „ტვიტერის“ საკუთარ გვერდზე.

შეგახსენებთ, ამერიკის პრეზიდენტის, დონალდ ტრამპის გადაწყვეტილებით, ქვეყანაში შენგენის ზონიდან ფრენები აიკრძალა.