COVID-19-თან დაკავშირებით გაცემული რეკომენდაციების გათვალისწინებით საქართველოს საპატრიარქოს წმიდა ანდრიას ქართულ უნივერსიტეტში 16 მარტს დისტანციური სწავლა დაიწყო. ამის შესახებ „ინტერპრესნიუსს“ წმიდა ანდრიას ქართული უნივერსიტეტიდან აცნობეს.
მათივე ინფორმაციით, სწავლება ZOOM-ის ყველაზე თანამედროვე პლატფორმაზე ხორციელდება და პროცესი ყოველგვარი გართულებების და ხარვეზების გარეშე მიმდინარეობს.
„ამჟამად SANGU სრულად არის დისტანციურ სწავლებაზე გადასული. ლექტორებს და სტუდენტებს გადაეცათ დეტალური ინფორმაცია და წესები, თუ როგორ უნდა წარიმართოს სწავლის პროცესი ახალი მოდელით.
უნივერსიტეტის წარმომადგენლების განცხადებით, ონლაინ სწავლებაზე გადასვლის პროცესი საკმაოდ სწრაფად და მარტივად მოხდა, რადგან უნივერსიტეტი სრულიად თანამედროვე ტექნიკითაა აღჭურვილი.
ონლაინ სწავლება საშუალებას იძლევა არ მოხდეს გაზაფხულის სემესტრის კიდევ უფრო მეტად გადაწევა ზაფხულის თვეებში და სტუდენტებმა სრულფასოვნად შეძლონ ზაფხულის არდადეგების გამოყენება.
ონლაინ სწავლება გაგრძელდება მანამ, სანამ შესაბამისი რეკომენდაციები და შეზღუდვები იმოქმედებს ქვეყანაში“,-ნათქვამია ინფორმაციაში, რომელსაც უნივერსიტეტი ავრცელებს.