ჯანდაცვის მინისტრი ეკატერინე ტიკარაძე მოქალაქეებს სისხლის ჩაბარებისკენ მოუწოდებს. აღნიშნულის შესახებ ტიკარაძემ უწყებათშორისი საბჭოს შეხვედრის დასრულების შემდეგ განაცხადა. როგორც მინისტრმა აღნიშნა, სისხლის გაღება იმ პაციენტებისთვისაა მნიშვნელოვანი, რომლებიც გადაუდებელ სამედიცინო ჩარევებს საჭიროებენ.
„ჯანდაცვის სამინისტრო იყო პირველი სტრუქტურა, რომელმაც დონაცია გაიღო. ჩვენ ასევე მოვუწოდეთ ჩვენს სსიპ-ს, რომ მიეღო ეს როგორც საჭიროება და საკმაოდ დიდი გამოწვევა ქვეყნისთვის. ჩვენი სსიპ-ები ეტაპობრივად, ყოველდღიურ რეჟიმში ერთვებიან დონაციაში. ყველა დანარჩენ სტრუქტურას, ვისაც აქვს საშუალება თავისი დასაქმებულების ჯანმრთელობიდან და ასაკიდან გამომდინარე ჩაერთონ ამ დიდ გამოწვევაში, რა თქმა უნდა, მოვუწოდებდი, რომ სისხლი ჩააბარონ. ეს ძალიან მნიშვნელოვანია იმ პაციენტებისთვის, რომლებიც დღესდღეობით სტაციონარებში იმყოფებიან. ისინი შეიძლება არ ებრძვიან კოვიდს, მაგრამ მათ აქვთ სხვა გადაუდებელი საჭიროებები და ეს არის ძალიან მნიშვნელოვანი აქცია“, - განაცხადა ტიკარაძემ.