ჯანდაცვის მინისტრის, ეკატერინე ტიკარაძის განცხადებით, გლდანში, დევნილთა დასახლებაში მცხოვრები მოქალაქეები დარჩებიან თვითიზოლაციაში თუ გადაიყვანენ საკარანტინო სივრცეებში, რამდენიმე დღეში გახდება ცნობილი.
როგორც მან უწყებათაშორისი საბჭოს სხდომის დასრულების შემდეგ განაცხადა, დევნილთა დასახლების დროებით იზოლაციაში მოქცევის გადაწყვეტილება მათ მიიღეს, რათა ექიმებს ვირუსის მოსაძიებელი ყველა საჭირო ღონისძიება ჩაეტარებინათ.
"ჩვენთვის, სახელმწიფოსთვის ძალიან მნიშვნელოვანია მოწყვლადი ჯგუფების და ასევე, ჩვენი დევნილების ჯანმრთელობასა და მათ უსაფრთხოებაზე ზრუნვა. აქედან გამომდინარე, იმისთვის, რომ ჩვენ ჩვენი ექიმებისთვის კომფორტული გარემო შეგვექმნა, მათ ჩაეტარებინათ ყველა საჭირო ღონისძიება და ამ დასახლებაში არ შექმნილიყო გლობალური პრობლემა, ეს გადაწყვეტილება ჩვენ მივიღეთ და კვლავ ვმსჯელობთ იმის თაობაზე, რომ დარჩებიან ისინი თვითიზოლაციაში თუ გადაყვანილები იქნებიან სახელმწიფოს მიერ მოწყობილ საკარანტინო სივრცეებში, რაც შემდეგი რამდენიმე დღის განმალობაში გახდება ცნობილი ჩვენი მოქალაქეებისთვის“, - განაცხადა ტიკარაძემ.