ოკუპირებული „სამხრეთ ოსეთის“ ე.წ. უშიშროების კომიტეტი იუწყება, რომ სოციალურ ქსელებსა და მესენჯერში, რომლებიც მათ მიერ კონტროლირებად ტერიტორიაზე გამოიყენება, გამოჩნდა ყალბი ინფორმაციები, წინასწარ კოვიდ-19-ით დაინფიცირებული ტესტების არსებობის შესახებ. ამის შესახებ სააგენტო „რესი“ იუწყება.

კომიტეტი აცხადებს, რომ მითითებული ყალბი გზავნილების გავრცელება ინიცირებულია მეზობელი სახელმწიფოს (რომელშიც გამოცემა ქართულ მხარეს გულისხმობს) სპეცსამსახურების მიერ და „რესპუბლიკის“ ხელმძღვანელობის დისკრედიტაციისა და მოსახლეობაში პანიკური განწყობის შესაქმნელად.

„ამასთან დაკავშირებით მოვუწოდებთ რესპუბლიკის მცხოვრებლებს, შეინარჩუნონ სიმშვიდე, გამოიჩინონ სამოქალაქო თვითშეგნება, დაიცვან სანიტარულ-ეპიდემიოლოგიური ორგანოების მითთებები და არ წამოეგონ დესტრუქციული ძალების პროვოკაციას, რომლებმაც მიზნად დაისახეს სამხრეთ ოსეთში საზოგადოებრივ-პოლიტიკური ვითარების გამწვავება კორონავირუსის პანდემიის ფონზე“ ,- ნათქვამია დე ფაქტო უწყების განცხადებაში.