ქობულეთის მუნიციპალიტეტის ადმინისტრაციულ ერთეულებში - გვარაში, მუხაესტატეში, ლეღვასა და წყავრუკაში, სადაც მკაცრი საკარანტინე რეჟიმი გამოცხადდა, ამ წუთებში თავდაცვის სამინისტროსა და შინაგან საქმეთა სამინისტროს თანამშრომლები სოფლებთან მისასვლელ გზებზე ბლოკ-პოსტებს ანთავსებენ.

მუნიციპალიტეტში ვითარებას ძალოვანი უწყებები გააკონტროლებენ.

როგორც ცნობილია, ქობულეთის მუნიციპალიტეტში, რამდენიმე ადმინისტრაციულ ერთეულში მკაცრი საკარანტინო შეზღუდვები დაწესდა.

ქობულეთის მუნიციპალიტეტში შემდეგ ადმინისტრაციულ ერთეულებში - გვარაში, მუხაესტატეში, ლეღვაში და წყავრუკაში აკრძალულია შესვლა და გამოსვლა. მოქალაქეებს გარეთ გამოსვლა შეეძლებათ მხოლოდ იმ შემთხვევაში, როდესაც ისინი საჭიროებენ პროდუქტის შეძენას, მედიკამენტის შეძენას, ან სამედიცინო მომსახურების მიღებას.

მათ ექნებათ უფლება განახორციელონ სასოფლო-სამეურნეო სამუშაოები, თუ დაიცავენ იმ პროტოკოლს, რომელიც სპეციალურად ასეთი შემთხვევებისთვის არის შექმნილი.

მუნიციპალიტეტთან და ადმინისტრაციულ ერთეულებთან თანამშრომლობას უზრუნველყოფს საოპერაციო შტაბი და ადგილობრივი ხელისუფლების ავტონომიური რესპუბლიკის მთავრობის თავმჯდომარე თორნიკე რიჟვაძე და პრემიერ-მინისტრის მრჩეველი რეგიონალურ საკითხებში, სოზარ სუბარი.