ის ფაქტი, რომ ჩვენ ვეხმარებით არა მხოლოდ ოფიციალურად დასაქმებულ პირებს, არამედ თვითდასაქმებულებსაც, კიდევ ერთხელ მეტყველებს, რომ ჩვენი პროგრამა არის საყოველთაო და არც ერთი კატეგორია არ გვინდა, რომ გამოგვრჩეს, - ამის შესახებ ეკონომიკისა და მდგრადი განვითარების მინისტრმა ნათია თურნავამ მთავრობის ადმინისტრაციაში გამართულ ბრიფინგზე განაცხადა. კითხვაზე, თუ როგორ მოხდება თვითდასაქმებულების იდენტიფიცირება, რათა მათ ასევე მიიღონ სოციალური ხასიათის დახმარება, მინისტრმა უპასუხა, რომ თვითდასაქმებულებისა და სოციალურად დაუცველ პირთა აღრიცხვა სპეციალური რეგულაციების მიხედვით მოხდება, რომელთაც შესაბამისი დარგობრივი სტრუქტურები გამოაქვეყნებენ.
ცნობისთვის, დღეს საქართველოს პრემიერ-მინისტრმა მთავრობის ანტიკრიზისული ეკონომიკური გეგმა წარადგინა, რომელიც საქართველოს ეკონომიკის შექმნილი რთული ვითარებიდან ეტაპობრივ გამოსვლას შეეხება. მასში განსაკუთრებული აქცენტია გაკეთებული მოსახლეობის სოციალურ დაცვასა და ბიზნესის მხარდაჭერაზე.
აღნიშნულ ინფორმაციას ეკონომიკისა და მდგრადი განვითარების სამინისტრო ავრცელებს.