ოკუპირებული ე.წ. სამხრეთ ოსეთის დე ფაქტო საგარეო საქმეთა სამინისტრომ მსოფლიოს ქვეყნებს და საერთაშორისო ორგანიზაციებს მიმართა, დაგმოს და საერთაშორისო სამართლით პასუხი აგებინოს საქართველოს ხელისუფლებას, რომელიც, მათი თქმით, 1918-20 წლების ხელისუფლების სამართალმემკვიდრეა და რომელმაც "სამხრეთ ოსეთის" მცხოვრებთა გენოციდი განახორციელა.

„სპუტნიკის“ ინფორმაციით, ამის შესახებ საუბარია რუსეთში ე.წ. სამხრეთ ოსეთის დე ფაქტო საელჩოს მიერ ე.წ. საგარეო საქმეთა სამინისტროს მსოფლიოს ქვეყნებისადმი, ასევე გაეროს, ეუთოს, ევროპის საბჭოსა და ევროპარლამენტისადმი მიმართვაში.

ცხინვალის მოთხოვნაა, ასევე, საქართველოს აგებინონ პასუხი 1989-2008 წლებში „სამხრეთ ოსეთის“ მოსახლეობის წინააღმდეგ ჩადენილი დანაშაულისთვის.