საფრანგეთის პრეზიდენტი ემანუელ მაკრონი დიდი ბრიტანეთის პრემიერ-მინისტრ ბორის ჯონსონთან შესახვედრად ლონდონს ესტუმრა.
ორი ქვეყნის ლიდერს შორის შეხვედრა დაუნინგ სტრიტზე მდებარე პრემიერის რეზიდენციაში შედგა. ისინი შეხვედრისას სოციალური დისტანციის დაცვას შეეცადნენ და ჯონსონი სტუმარს თავის დაკვრით მიეგება.
აღნიშნული შეხვედრა გენერალ შარლ დე გოლის 1940 წლის 18 ივნისის სახალხო მიმართვასთან დაკავშირებული თარიღის ღონისძიებების ფარგლებში დაიგეგმა.
80 წლის წინ, მეორე მსოფლიო ომის დროს, დე გოლმა BBC-ის რადიოსადგურის მეშვეობით მიმართა ფრანგ ხალხს და ნაცისტების ოკუპაციის წინააღმდეგ ბრძოლისკენ მოუწოდა, რამაც იმედი ჩაუსახა მოსახლეობას.
როგორც „როიტერი“ წერს, ეს შეხვედრა ჯონსონს, ასევე, შესაძლებლობას აძლევს ევროკავშირთან „ბრექსითის“ მიმდინარე მოლაპარაკებების საკითხი წამოჭრას და კორონავირუსის პანდემიის საპასუხო ნაბიჯებზე იმსჯელონ.