„სამოქალაქო მოძრაობის“ ლიდერი ალეკო ელისაშვილი არ გამორიცხავს, რომ ის, ანა დოლიძე და ლევან კობერიძე, რომლებთან ერთადაც პოლიტიკური პლატფორმა შექმნა, თბილისის ოლქებში მაჟორიტარობის კანდიდატებად წარდგნენ. ამის შესახებ ალეკო ელისაშვილმა „ინტერპრესნიუსს“ განუცხადა.

მისივე ინფორმაციით, ამ საკითხზე კონსულტაციები მათ მიერ შექმნილი პოლიტიკური პლატფორმის ფარგლებში მიმდინარეობს.

„ჩვენს ახალ პლატფორმაში შემავალი ადამიანები - მე, ლევან კობერიძე, ანა დოლიძე - ვფიქრობთ და არ გამოვრიცხავთ, რომ შეიძლება ჩვენ სამის კანდიდატურა თბილისის მაჟორიტარულ ოლქებში დავაყენოთ. მე თუ დავდგები მაჟორიტარად, ეს მხოლოდ და მხოლოდ საბურთალოზე იქნება, ანა დოლიძესთან და ლევან კობერიძესთან დაკავშირებით ვმსჯელობთ,“ - განაცხადა ელისაშვილმა.