გვაქვს იმედი, რომ მეორე და მესამე მოსმენითაც მიიღებენ საკონსტიტუციო ცვლილებებს თავისივე ხმებით და რურუასაც გამოუშვებენ. თუ რომელიმე ერთი კომპონენტი ვერ შეასრულა ბიძინა ივანიშვილმა, ეს მას დაღუპავს ბოლომდე, მაგრამ ეს არ არის ის, რაც ჩვენ გვსურს, ქვეყანას ურჩევნია ნორმალური ატმოსფერო, - ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ საკონსტიტუციო ცვლილებებზე საუბრისას განაცხადა.

მისივე თქმით, საკონსტიტუციო ცვლილებების ჩავარდნის შემთხვევაში ეს სრულად მმართველი გუნდის პასუხისმგებლობა იქნება და „ევროპულმა საქართველომ“ მათ ამ პროცესის ნორმალიზებისთვის „ყველა შანსი მისცა“.

„საკონსტიტუციო ცვლილებების ჩავარდნის შემთხვევაში ეს მათი პასუხისმგებლობაა მთლიანად, უნდა გაათავისუფლონ პოლიტპატიმარი რურუა და მიიღონ საკონსტიტუციო ცვლილებები. მივეცით შანსი, რომ არც თავი დაეღუპათ და არც ზიანი არ მიეყენებინათ. ვნახოთ, რას იზამენ თვითონ, ჩვენგან რა შანსის მიცემაც შეიძლებოდა ამ პროცესის ნორმალიზებისთვის, იყო მიცემული და ახლა მათი პასუხისმგებლობაა როგორ მოიქცევიან. ლაპარაკი არ არის მხოლოდ ძალიან მნიშვნელოვან საკონსტიტუციო ცვლილებებზე, ლაპარაკია თამაშის წესებზე. თუ ხელისუფალი აცხადებს, რომ ფეხებზე მკიდია მთელი საზოგადოება, ეს არის სულ სხვა კლიმატი ქვეყნის შიგნით და ქვეყნის გარეთ მეგობრებისთვის. გვაქვს იმედი, რომ მეორე და მესამე მოსმენითაც მიიღებენ თავისივე ხმებით და რურუასაც გამოუშვებენ, თუ რომელიმე ერთი კომპონენტი ვერ შეასრულა ბიძინა ივანიშვილმა ეს მას დაღუპავს ბოლომდე, მაგრამ ეს არ არის ის რაც ჩვენ გვსურს, ქვეყანას ურჩევნია ნორმალური ატმოსფერო,“ - განაცხადა გიგა ბოკერიამ.