ნიუ-იორკის, ნიუ-ჯერსისა და კონეკტიკუტის შტატებში ამერიკის 9 შტატიდან დაბრუნებულ მოქალაქეებს, სადაც ბოლო პერიოდში კორონავირუსის შემთხვევების მატება ფიქსირდება, 14-დღიან სავალდებულო კარანტინში გაუშვებენ, - ამის შესახებ ინფორმაციას BBC-ი ავრცელებს.

გამოცემის ცნობით, კარანტინის წესები გავრცელდება იმ მოქალაქეებზე, რომლებიც ალაბამას, არკანზასის, არიზონას, ფლორიდას, ჩრდილოეთ კაროლინას, სამხრეთ კაროლინას, ტეხასის, ვაშინგტონისა და იუტას შტატებიდან დაბრუნდებიან.

პირი, რომელიც კარანტინს დაარღვევს, 1 000 აშშ დოლარით დაჯარიმდება.

ცნობისათვის, აშშ-ში 24 ივნისს კორონავირუსის 24 485 ახალი შემთხვევა დადასტურდა და 646 ადამიანი დაიღუპა. საერთო ჯამში, ქვეყანაში ვირუსით დაინფიცირების 2 371 422 შემთხვევაა დადასტურებული, დაღუპულთა რაოდენობა კი 121 000-ს აჭარბებს.