მთავრობა, რომელსაც ჯებირები, კედლები და ღობეები სჭირდება საკუთარი თავის დასაცავად საკუთარი მოქალაქეებისგან, სერიოზულ პოლიტიკურ კრიზისშია შესული , - ამის შესახებ "ნაციონალური მოძრაობის" წევრმა სალომე სამადაშვილმა ჟურნალისტებთან განაცხადა, რითაც გამოეხმაურა ინფორმაციას იმის შესახებ, რომ პარლამენტის წინ დამატებით ჯებირები განათავსეს.

სალომე სამადაშვილის განცხადებით, პარლამენტის წინ მიმდებარე სამუშაოებით ხელისუფლება მოქალაქეების პროტესტის შეზღუდვას ცდილობს.

"ჩვენ ვხედავთ, რომ უკვე მრავალი თვეა მიმდინარეობს პარლამენტის წინ სარემონტო სამუშაოები, რომელიც რეალურად არის მცდელობა, რომ ხელი შეუშალონ ტრადიციული თავშეყრის ადგილას ხალხის შეკრებას. თუ ეს რაღაც დამატებითი წინაღობაა, ეს გვაჩვენებს, თუ რა ღრმა კრიზისშია შესული "ქართული ოცნება", რადგან მთავრობა, რომელსაც ჯებირები, კედლები და ღობეები სჭირდება საკუთარი თავის დასაცავად საკუთარი მოქალაქეებისგან, არის შესული სერიოზულ პოლიტიკურ კრიზისში", - განაცხადა სამადაშვილმა.