„საქართველოს ხელისუფლების ქმედებებმა „სამხრეთ ოსეთის“ ე.წ. საზღვრებთან მორიგ დაძაბულ ვითარებამდე მიგვიყვანა“ , - სააგენტო „რესის“ ინფორმაციით, ამის შესახებ ოკუპირებული ე.წ. სამხრეთ ოსეთის დე ფაქტო პარლამენტის სპიკერმა ანატოლი ტადტაევმა განაცხადა.

„სამხრეთ ოსეთის ირგვლივ დაძაბულობის კერების შექმნა - ეს საქართველოს დიდი ხნის სახელმწიფო პოლიტიკაა. ისინი ვერაფრით მშვიდდებიან და უარს არ ამბობენ თავის რევანშისტულ გეგმებზე. ამას მოწმობს ახალი უკანონო პოსტების განთავსება ჩვენ ტერიტორიასთან ახლოს“ , - განაცხადა დე ფაქტო სპიკერმა.

მისი თქმით, საქართველოს ხელისუფლების ქმედება მოწმობს სურვილის უქონლობას, უარი თქვას თავის აგრესიულ პოლიტიკაზე „სამხრეთ ოსეთის“ მიმართ.

ტადტაევის თქმით, თუკი „სამხრეთ ოსეთის“ ტერიტორიაზე საქართველოს მხრიდან დაფიქსირდება რაიმე სახის საწინააღმდეგო ქმედება, ასეთ შემთვევაში, სამხრეთ ოსეთი შეძლებს თავისი საზღვრების დაცვას.

„გარკვეული შეშფოთება ჩვენ საზღვრებთან ქართული პოსტების განთავსების გამო, სამხრეთ ოსურ მხარეს გააჩნია, რა თქმა უნდა, მაგრამ სამხრეთ ოსეთი უკვე დამოუკიდებელი სახელმწიფოა, რომელიც თავის საზღვრებს დაიცავს“, - განაცხადა ტადტაევმა.

მისივე თქმით, ოკუპირებული ცხინვალის ე.წ. პარლამენტი აპირებს მიმართოს მსოფლიო თანამეგობრობას, სამართლებრივად შეაფასონ საქართველოს ქმედებები.