გარდაცვლილი, 23 წლის თამარ ბაჩალიაშვილის მამა, ჯუმბერ ბაჩალიაშვილი აცხადებს, რომ სამხარაულის ექსპერტიზის ეროვნული ბიუროდან ცხედარი არაა გადასვენებული და ბიუროში უთხრეს, რომ ყინული არ აქვთ.

„სამხარაულის ექსპერტიზის ეროვნულ ბიუროში ყინული არ აქვთ. ბიძაშვილი იყო და იმას უთხრეს, ისეთ მდგომარეობაშია, რომ ვერ გადმოვასვენებთო, თან ყინული არ აქვთ, ამიტომაც შევფერხდით, არ ვიცი. მერე ბიჭებმა ირბინეს, ყინული ნაშოვნია და დილით ადრე უნდა მივიტანოთ“, - აცხადებს ბაჩალიაშვილი.

მისივე თქმით, ტყუილია თითქოს გოგონას დრონით ეძებდნენ.

„დღეს ვნახე, როგორც ხელის გულზე, ისე ჩანს მანქანა. ტყუილია, რომ იძახიან დრონი გავატარეთო. წელავდნენ, სანამ გუშინ აქცია არ ჩატარდა და ხალხის აგრესია არ დაინახეს, იქამდე არ გამოჩნდა და მე ვფიქრობ, ალბათ არ გამოჩნდებოდა. არ მჯერა, რომ ეს თვითმკვლელობაა, ეს გარედან მოდის. ეჭვი მაქვს და ამასაც მერე დავამტკიცებთ“,- განაცხადა ჯუმბერ ბაჩალიაშვილმა „მთავარის“ ეთერში.