მედიის ინფორმაციით, ოკუპირებულ აფხაზეთში კორონავირუსით პაციენტი გარდაიცვალა. კონკრეტულად კი, კორონავირუსისგან მოსახლეობის დაცვის დე ფაქტო რეჟიმის ოპერატიული შტაბის მონაცემებით, კვირა ღამით, 26 ივლისს, გუდაუთის ცენტრალურ რაიონულ საავადმყოფოში პაციენტი კორონავირუსის ინფექციით დაიღუპა.
მათივე ცნობით, ცოტა ხნის წინ პაციენტი სოხუმის საავადმყოფოდან გადაიყვანეს. ე.წ. ოპერატიული შტაბის ცნობით, პაციენტს თანმხლები კარდიო დაავადებები ჰქონდა.
ამჟამად გუდაუთის საავადმყოფოში კორონავირუსით ინფიცირებული 8 პაციენტი მკურნალობს.
„მოსახლეობის კორონავირუსის ინფექციისგან დაცვის ოპერატიული შტაბი აფხაზეთის მოქალაქეებს მოუწოდებს დაიცვან ყველა საჭირო უსაფრთხოების ზომა, რათა დაინფიცირებისგან თავი დაიცვან“, - აცხადებენ დე ფაქტო ხელისუფლებაში.