აფხაზეთის ოკუპირებული რეგიონის ე.წ. „სახელმწიფო უნივერსიტეტის მისაღები კომიტეტის გადაწყვეტილებით“, აფხაზეთის უნივერსიტეტში ყველა აბიტურიენტი უგამოცდოდ ჩაირიცხა.
ინფორმაციას ამის შესახებ ადგილობრივი მედია ე.წ. აფხაზეთის სახელმწიფო უნივერსიტეტის პირველ რექტორზე, ვიქტორ მალანძიაზე დაყრდნობით ავრცელებს.
„იმის გამო, რომ ბოლო დროს ქვეყანაში კორონავირუსთან დაკავშირებული სიტუაცია გაუარესდა, ვირუსის გავრცელების პრევენციის მიზნით მივიღეთ გადაწყვეტილება, რომ აპლიკანტები გამოცდების გარეშე მივიღოთ,“- განაცხადა ვიქტორ მალანძიამ.
მისივე თქმით, მიღებული გადაწყვეტილების კიდევ ერთი მიზეზი ის გახდა, რომ კარანტინის პირობებში აბიტურიენტები გამოცდებისთვის სათანადოდ ვერ მოემზადნენ.
დე-ფაქტო ხელისუფლების ცნობით, წელს აფხაზეთის უნივერსიტეტში განაცხადი 668 აბიტურიენტმა შეიტანა.