გიგა ბოკერიას განცხადებით, „ევროპული საქართველო“ „ნაცმოძრაობას“ დიდ ქალაქებში კანდიდატებს უთმობდა, ხოლო მხარდაჭერას მხოლოდ 4 ოლქში თხოვდნენ

„ევროპული საქართველოს“ ერთ-ერთმა ლიდერმა გიგა ბოკერიამ იმ შეთანხმებებზე ისაუბრა, რაც ოპოზიციურ პარტიებს შორის განიხილებოდა.

გიგა ბოკერიას თქმით, „ევროპული საქართველო“ „ნაციონალურ მოძრაობას“ დიდ ქალაქებში კანდიდატებს უთმობდა, ხოლო ისინი მხარდაჭერას „ნაციონალურ მოძრაობას“ მხოლოდ 4 ოლქში თხოვდნენ.

გიგა ბოკერიას თქმით, „ნაციონალურ მოძრაობას“ კიდევ აქვს შანსი ოპოზიციის მხრიდან შეთავაზებული ვირიანტები განიხილოს და შეჯერდნენ.

„ჩვენ „ნაციონალურ მოძრაობას“ ვთვაზობთ 2 ვარიანტს. ფართო ვარიანტი, როდესაც ამ შემთხვევაში „ნაციონალური მოძრაობა“ აყენებს კანდიდატს, რომელსაც თბილისში შეთანხმების მონაწილე ყველა პარტია უჭერს მხარს დიდ ქალაქებში. ეს არის, თელავი, რუსთავი, ქუთაისი, ზუგდიდი, ბათუმი, ახალციხე, ფოთი ან მარტვილი, ბოლნისი, ქობულეთი, ჭიათურა.

ხოლო, „ნაციონალური მოძრაობა“ უჭერს მხარს დანარჩენი პარტიების შეჯერებულ კანდიდატებს შემდეგ ოლქში- თერჯოლა, სამტრედია, ხელვაჩაური, ზემო აჭარა, ფოთი ან მარტვილი, ხაშური, მცხეთა-მთიანეთი, გურია, რაჭა.

ჩვენ მიგვაჩნია ამ ტიპის ფართო შეთანხმებაა უკეთესი. თუ ეს შეთანხმება ვერ შედგება რაიმე მიზეზით, ჩვენ „ევროპული საქართველო“ უფრო ვიწრო შეთანხმებას ვთავაზობდით. ყველა დიდ ქალაქში ჩვენ მათ კანდიდატებს ვუთმობდით, ჩვენ ვითხოვდით მხარდაჭერას მათგან მხოლოდ 4 ოლქში, სადაც ძალიან ძლიერი კანდიდატები გვყავს“,-განაცხადა გიგა ბოკერიამ.