დავით ზალკალიანი თბილისში ევროპის საბჭოს ოფისის ახალ ხელმძღვანელს შეხვდა

საქართველოს საგარეო საქმეთა მინისტრის, დავით ზალკალიანის გაცნობითი შეხვედრა გაიმართა თბილისში ევროპის საბჭოს ოფისის ახალ ხელმძღვანელთან, ნატალია ვუტოვასთან.

როგორც „ინტერპრესნიუსს“ საგარეო საქმეთა სამინისტროდან აცნობეს, შეხვედრის დასაწყისში საქართველოს საგარეო საქმეთა მინისტრმა ნატალია ვუტოვას ახალ თანამდებობაზე დანიშვნა მიულოცა და წარმატებები უსურვა.

უწყების ინფორმაციით, მხარეებმა ხაზი გაუსვეს საქართველოსა და ევროპის საბჭოს შორის არსებული მჭიდრო თანამშრომლობის მნიშვნელობას.

„ამასთანავე, ყურადღება გამახვილდა ევროპის საბჭოს მინისტრთა კომიტეტში საქართველოს წარმატებულ თავმჯდომარეობაზე. აღინიშნა, რომ თავმჯდომარეობის პერიოდი მართლაც გამოწვევებით იყო სავსე, რაც განპირობებული იყო კოვიდ-19-ის პანდემიით, თუმცა საქართველომ შეძლო თავმჯდომარეობის წარმატებით დასრულება. შეხვედრისას ასევე ხაზი გაესვა იმ ფაქტს, რომ საქართველომ, შერჩეული პრიორიტეტების შესაბამისად, ხელშესახები მემკვიდრეობა დატოვა.

ევროპის საბჭოს ოფისის ხელმძღვანელმა ასევე ისაუბრა საქართველოსთვის ევროპის საბჭოს 2020-2023 წწ. სამოქმედო გეგმაზე. აღინიშნა, რომ ოფისი აქტიურად განაგრძობს მუშაობას სამოქმედო გეგმის ფარგლებში არსებული პროექტების განსახორციელებლად. ხაზი გაესვა იმ ფაქტს, რომ უკვე მოძიებულია დაფინანსების დიდი ნაწილი. მინისტრის განცხადებით, სამოქმედო გეგმა ერთ-ერთი მნიშვნელოვანი ინსტრუმენტია, რომელიც ხელს უწყობს ქვეყანაში დემოკრატიის კონსოლიდირებას.

მინისტრმა ასევე ყურადღება გაამახვილა ევროპის საბჭოს გენერალური მდივნის კონსოლიდირებული ანგარიშის მნიშვნელობაზე, რომელიც წელიწადში ორჯერ მზადდება. აღინიშნა, რომ კონსოლიდირებული ანგარიშით მუდმივად ხდება ევროპის საბჭოს წევრი ქვეყნების ინფორმირება საქართველოს ოკუპირებულ ტერიტორიებზე შექმნილ ვითარებასთან დაკავშირებით და შესაბამისად, აღნიშნული ანგარიში მნიშვნელოვანი ინსტრუმენტია.

საუბარი ასევე შეეხო საქართველოში წელს დაგეგმილ საპარლამენტო არჩევნებს. მინისტრმა ხაზი გაუსვა დაგეგმილი არჩევნების მნიშვნელობას და მის თავისუფალ და სამართლიან გარემოში ჩატარების უზრუნველსაყოფად საქართველოს მთავრობის მაქსიმალურ ძალისხმევას. მინისტრის განცხადებით, მიუხედავად მსოფლიოში არსებული ეპიდემიოლოგიური ვითარებისა, საქართველოში ყველა საჭირო პირობაა შექმნილი მაქსიმალური რაოდენობის საერთაშორისო დამკვირვებლების მისაღებად. აღნიშნულ კონტექსტში, მინისტრი მიესალმა საქართველოს საპარლამენტო არჩევნებთან დაკავშირებით, ევროპის საბჭოს საპარლამენტო ასამბლეის სადამკვირვებლო დელეგაციის საქართველოში დაგეგმილ ვიზიტს“,-აღნიშნულია საგარეო საქმეთა სამინისტროს მიერ გავრცელებულ ინფორმაციაში.

უწყების ცნობით, ამავე დღეს გაცნობითი შეხვედრა გაიმართა თბილისში ევროპის საბჭოს ოფისის ახალ ხელმძღვანელს, ნატალია ვუტოვასა და საქართველოს საგარეო საქმეთა მინისტრის მოადგილეს, ლაშა დარსალიას შორის.

„მხარეებმა კიდევ ერთხელ გაუსვეს ხაზი საქართველოსა და ევროპის საბჭოს შორის არსებულ ორმხრივ თანამშრომლობას. მინისტრის მოადგილემ, თბილისში ევროპის საბჭოს ოფისის ხელმძღვანელს მიაწოდა ინფორმაცია რუსეთის მიერ ოკუპირებულ საქართველოს ტერიტორიებზე არსებული მძიმე ჰუმანიტარული ვითარებისა და ადამიანის უფლებათა უხეში დარღვევების შესახებ. აქვე, ხაზი გაესვა საერთაშორისო მექანიზმების რუსეთის მიერ ოკუპირებულ საქართველოს რეგიონებში დაუყოვნებლივი შესვლის მნიშვნელობას“,-აღნიშნულია ინფორმაციაში.

იოსებ ბარათაშვილი - სააკაშვილის პატიმრობაში ყოფნა საქართველოს  ხელისუფლებას საკმაოდ  რთული პრობლემის წინაშე აყენებს
ქართული პრესის მიმოხილვა 18.10.2021
ვახტანგ ძაბირაძე - თუ ხელისუფლება და ოპოზიცია მეორე ტურის უკეთ გასაკონტროლებლად კონკრეტულ მექანიზმებზე ვერ შეთანხმდნენ, მაშინ გამოვა, რომ ორივე მხარე შეგნებულად მიდის ვითარების გამწვავებაზე
„გორგია“ ბათუმში დაზარალებულ ყველა ოჯახს მათთვის საჭირო ტექნიკას, ავეჯსა და საყოფაცხოვრებო ნივთებს გადასცემს