„სტრატეგია აღმაშენებელი“ ლოზუნგით - „მოვითხოვთ დაიწყოს გამოძიება „პატრიოტთა ალიანსის“ კავშირებზე კრემლთან“ ბათუმში აქციას მართავს
"სტრატეგია აღმაშენებლის" ბათუმის ახალგაზრდულმა ორგანიზაციამ, „პატრიოტთა ალიანსის“ საარჩევნო ბანერთან დაკავშირებით საპროტესტო აქცია გამართა და მმართველი პარტია ამ ძალასთან კავშირში ღიად დაადანაშაულა. როგორც აქციის მონაწილეები აცხადებენ, „პატრიოტთა ალიანსის“ ეს ქმედება კრემლის ინტერესებს ატარებს.
"დამსხვრეული ოცნებების პარტია წლებია ალიანსშია იმ ძალასთან, რომელიც გამოირჩევა ანტიდასავლური და კრემლის პროპაგანდისტული გზავნილების გავრცელებაში. მმართველი პარტია მიუხედავად ოპოზიციის საერთო მოთხოვნისა არ იძიებს მათ ფინანსურ კავშირებს კრემლთან. დღევანდელი საარჩევნო ბანერი, სადაც დატანილია რუსეთის მიერ ოკუპირებულ რეგიონებთან ერთად აჭარა, ემსახურება კრემლის ინტერესებს. მოვითხოვთ დაუყოვნებლივ დაიწყოს ამ საქმის გამოძიება" - აცხადებს აქციის მონაწილე ბექა დიასამიძე.
შეგახსენებთ, რომ „პატრიოტთა ალიანსმა“ გონიოში საარჩევნო ბანერი განათავსა, სადაც საქართველოს ოკუპირებული რეგიონების მსგავსად, აჭარის ავტონომიური რესპუბლიკაც წითლად არის მონიშნული და წერია: „დაიცავი აჭარა! დაიცავი შენი წილი საქართველო!“
