რუსეთი ოკუპირებულ ცხინვალთან ე.წ. საზღვარს გახსნის, - ადგილობრივი მედიის ინფორმაციით, შესაბამისი გადაწყვეტილება რუსეთის კორონავირუსთან ბრძოლის ოპერატიული შტაბის სხდომაზე მიიღეს.

მათივე ინფორმაციით, ე.წ. საზღვრის გახსნაზე გადაწყვეტილებას პრემიერ-მინისტრი მიხაილ მიშუსტინი უახლოეს დღეებში მოაწერს ხელს.

„სხდომამ მიიღო გადაწყვეტილება, სამხრეთ ოსეთის რესპუბლიკასთან სახელმწიფო საზღვრის გახსნის შესახებ. შესაბამისი განკარგულება მთავრობის მეთაურის, მიხაილ მიშუსტინის მიერ უახლოეს დღეებში იქნება ხელმოწერილი“, - ნათქვამია ოპერატიული შტაბის მიერ გავრცელებულ ინფორმაციაში.

შეგახსენებთ, 30 აგვისტოს ოკუპირებული ცხინვალის ე.წ. პრეზიდენტმა ანატოლი ბიბილოვმა რუსეთს ე.წ. საზღვრის 15 სექტემბერს გახსნა შესთავაზა. ე.წ. საზღვარი კორონავირუსის პანდემიის გამო მაისიდანაა ჩაკეტილი.