თურქეთი არ მოელის, რომ აღმოსავლეთ ხმელთაშუა ზღვაში საბერძნეთთან და კვიპროსთან უთანხმოების გამო მას ევროკავშირი სანქციებს დაუწესებს. ამის შესახებ ქვეყნის საგარეო საქმეთა მინისტრმა მევლუთ ჩავუშოღლუმ განაცხადა.

„გულწრფელად რომ ვთქვა, არ ველოდები სანქციების შესახებ გადაწყვეტილებას 24-25 სექტემბერს დაგეგმილ სამიტზე, თუმცა შეიძლება იყოს კიდეც. არსებობს ასეთი შესაძლებლობა. ის შეიძლება იყოს ჩვენი გემების, კომპანიების ან ცალკეული პირების წინააღმდეგ. მათ ასეთი გადაწყვეტილებები წარსულშიც მიუღიათ. ჩვენ უარი ვთქვით ჩვენს გადაწყვეტილებებზე? არა, ჩვენი შეუპოვრობა გაიზარდა“, - განაცხადა ჩავუშოღლუმ.

მან გაიმეორა, რომ თურქეთი ღიაა მოლაპარაკებებისთვის წინაპირობების გარეშე, მაგრამ დასძინა, რომ სეისმური კვლევითი ხომალდი Oruc Reis მალე განაახლებს მუშაობას. ცნობისთვის, ევროკავშირის ლიდერები 24-25 სექტემბერს სპეციალურ სამიტს გამართავენ, სადაც კვიპროსსა და თურქეთს შორის აღმოსავლეთ ხმელთაშუაზღვისპირეთის ენერგორესურსებთან დაკავშირებით არსებული კრიზისის დაძლევის გზებზე იმსჯელებენ.