ოკუპირებული ე.წ. სამხრეთ ოსეთი დე ფაქტო პარლამენტში ვერშემდგარი კვორუმის გამო, ე.წ. პრემიერ - მინისტრის გარეშე დარჩა. სააგენტო „რესის“ ინფორმაციით, ე.წ. პარლამენტს გენადი ბეკოევის კანდიდატურა დღეს უნდა დაემტკიცებინათ. თუმცა, საჭირო კვორუმი ვერ შეაგროვეს და სხდომა ჩაიშალა.

ე.წ. დეპუტატის, ალან გაბატოვის თქმით, მისი კომიტეტის კონსულტანტებმა სათითაოდ დაურეკეს ყველა „დეპუტატს“, რომლებსაც არ სურთ ე.წ. პარლამენტის სხდომებზე დასწრება.

ცნობისთვის, ოკუპირებული ე.წ. სამხრეთ ოსეთის დე ფაქტო პრეზიდენტმა ანატოლი ბიბილოვმა ე.წ. პარლამენტს გენადი ბეკოევის კანდიდატურა წარუდგინა მარიონეტული მთავრობის თავმჯდომარის თანამდებობაზე დასამტკიცებლად.

ბეკოევი 29 აგვისტოდან ე.წ. პრემიერ - მინისტრის მოვალეობას ასრულებს მას შემდეგ, რაც ბიბილოვმა ე.წ. მინისტრთა კაბინეტი მრავალათასიანი საპროტესტო მიტინგის ფონზე დაითხოვა.