ოკუპირებული სოხუმის #1 სკოლა, რომლის ერთ-ერთი პედაგოგი კორონავირუსით გარდაიცვალა, დროებით დაიხურა, - ამის შესახებ ინფორმაციას „სპუტნიკი“ სკოლის დირექტორ ნონა დელბაზე დაყრდნობით ავრცელებს.
გამოცემის ცნობით, მოსწავლეები თავიანთ სახლებში 2-კვირიან კარანტინს გაივლიან.
სკოლის დირექტორის განმარტებით, კვირას დირექციას აცნობეს, რომ ერთ-ერთი პედაგოგი, რომელიც კოვიდ 19-ით იყო ინფიცირებული, გარდაიცვალა, გარდა ამისა, ინფიცირების შემთხვევები სკოლის ხუთ კლასში გამოვლინდა.
დირექტორის თქმით, მან ეპიდსიტუაციის შესახებ ე.წ. „განათლების მინისტრს“ აცნობა, რომელმაც მოსწავლეების 2 კვირით დათხოვნის განკარგულება მისცა.
დე-ფაქტო ხელისუფლების მონაცემებით, ოკუპირებულ აფხაზეთში, საერთო ჯამში, კორონავირუსის 939 შემთხვევაა გამოვლენილი.