რეჯეფ თაიფ ერდოღანი ემანუელ მაკრონს - ანკარას ყველა პრობლემის მოლაპარაკებების მაგიდასთან განხილვა და გადაწყვეტა სურს
თურქეთისა და საფრანგეთის პრეზიდენტებმა, რეჯეფ თაიფ ერდოღანმა და ემანუელ მაკრონმა, სატელეფონო საუბარი გამართეს, რომლის დროსაც აღმოსავლეთ ხმელთაშუაზღვისპირეთთან, ორმხრივ კავშირებსა და ანკარასა და ევროკავშირს შორის ურთიერთობებთან დაკავშირებული საკითხები განიხილეს.
თურქეთის კომუნიკაციების დირექტორატის ინფორმაციით, პრეზიდენტმა რეჯეფ თაიფ ერდოღანმა ფრანგ კოლეგას ემანუელ მაკრონს განუცხადა, რომ თურქეთი მხარს უჭერს დიალოგს და თანამშრომლობას პრობლემების გადასაჭრელად.
ერდოღანმა ხაზი გაუსვა, რომ რეგიონში არსებული დაძაბულობის მიზეზი „აღმოსავლეთ ხმელთაშუაზღვისპირეთის რეგიონში თურქეთისა და კვიპროსელი თურქების კანონიერი უფლებების უგულვებელყოფაა.“ მისივე თქმით, „ანკარას ყველა პრობლემის მოლაპარაკებების მაგიდასთან განხილვა და გადაწყვეტა სურს.“
სატელეფონო საუბრის შესახებ ინფორმაცია „ელისეის სასახლემაც“ გაავრცელა. მათი ცნობით, მაკრონმა განაცხადა, რომ მისი ქვეყანა დიალოგისთვის ყოველთვის მზადაა. საფრანგეთის პრეზიდენტმა ევროკავშირსა და თურქეთს შორის მყარი ურთიერთობების მნიშვნელობაზეც ისაუბრა.
ინფორმაციაში ასევე ხაზგასმულია, რომ ემანუელ მაკრონი მიესალმება თურქეთსა და საბერძნეთს შორის დაგეგმილ საცდელ მოლაპარაკებებს და იმედი აქვს, ეს მოლაპარაკებები რეგიონში არსებულ დაძაბულობას განმუხტავს.
v-if="article.gallery" v-html="article.gallery"
