სამოქალაქო აქტივისტებმა პარლამენტთან პრეზიდენტის მიერ პატიმარ გიორგი რურუას შეწყალების მოთხოვნით ხელმოწერების შეგროვება დაიწყეს.

როგორც სამოქალაქო აქტივისტმა ირაკლი ფავლენიშვილმა განაცხადა, საჭიროა საქართველოს პრეზიდენტმა სალომე ზურაბიშვილმა 8 მარტის შეთანხმების შესრულებაში პოზიტიური როლი შეასრულოს და გიორგი რურუა კონსტიტუციით მინიჭებული შესაძლებლობის თანახმად გაათავისუფლოს.

"2020 წლის 8 მარტს მოეწერა ხელი ისტორიულ შეთანხმებას საქართველოს მმართველ პარტიასა და ოპოზიციურ სპექტრს შორის, რომლის მიზანი იყო საკონსტიტუციო ცვლილება და მართლმსაჯულების პოლიტიკური გავლენისგან ერთხელ და სამუდამოდ გათავისუფლება. ეს შეთანხმება ვერ ჩაითვლება შესრულებულად, ვიდრე პატიმრობაში რჩება გიორგი რურუა, ეს არის არა მარტო ჩვენი, არამედ ჩვენი საერთაშორისო პარტნიორების მტკიცე და პრინციპული პოზიცია. აქედან გამომდინარე, ჩვენ მივიჩნევთ, რომ ქვეყანაში პოლარიზებული პოლიტიკური გარემოს შესამცირებლად, საჭიროა რურუას გათავისუფლება. ამიტომ ჩვენ დღეს ვიწყებთ ხელმოწერების შეგროვებას და გვინდა მივმართოთ საქართველოს პრეზიდენტს, სალომე ზურაბიშვილს, რომ გაათავისუფლოს გიორგი რურუა და შეასრულოს დადებითი როლი ამ შეთანხმების შესრულებაში და გამოიყენოს კონსტიტუციით მინიჭებული შესაძლებლობა",-განაცხადა ირაკლი ფავლენიშვილმა.