ოპოზიციურ პარტიებს შორის ცეცხლის გახსნა, ქვემეხები და ა.შ. არაფერ შუაშია, ეს არის საღი დისკუსია, სადაც „ევროპული საქართველო“ ცდილობს აჩვენოს, რა განსხვავებაა მას და სხვა პარტიებს შორის, - ამის შესახებ „ევროპული საქართველოს“ მაჟორიტარობის კანდიდატმა რუსთავსა და გარდაბანში, ირმა ნადირაშვილმა „პალიტრანიუსის“ გადაცემა „ნიუსრუმში“ განაცხადა, რითაც „ევროპულ საქართველოსა“ და „ნაციონალურ მოძრაობას“ შორის არსებულ დაძაბულ ფონზე ისაუბრა.
მისივე თქმით, პარტიებს შორის არსებული პოლემიკა არჩევნების დასრულებამდე გაგრძელდება და ეს ბუნებრივია.
„არჩევნების დასრულებამდე ასეთი ტიპის პოლემიკა და დისკუსია აუცილებლად იქნება, ეს აბსოლუტურად ნორმალურია. ამომრჩეველი გაყოფილია ორად. ერთი ფლანგი მყარად უჭერს ხელისუფლებას მხარს, ხოლო მეორე ფლანგი ოპოზიციურად არის განწყობილი და ახლა არჩევს, რომელ ოპოზიციურ პარტიას დაუჭიროს მხარი. ამიტომ ძალიან ბუნებრივია, რომ ყველა პარტიამ მათ შორის, „ევროპულმა საქართველომ“ აჩვენოს, რა განსხვავებები აქვს სხვა პარტიებთან“, - განაცხადა ირმა ნადირაშვილმა.