უზბეკეთის 400-მდე მოქალაქე ოკუპირებული აფხაზეთიდან გასვლას ვერ ახერხებენ, რისი მიზეზიც ოკუპირებულ რეგიონსა და რუსეთს შორის ე.წ. საზღვარზე არსებული შეზღუდვებია. ამის შესახებ „სპუტნიკი“ იუწყება.
დღეს გავრცელდა დე ფაქტო საგარეო საქმეთა სამინისტროს განცხადება, რომ უზბეკეთის მოქალაქეები დაბრუნებას ოქტომბერში შეძლებენ. პირველი ჯგუფში კი ფეხმძიმეები, მოხუცები და ბავშვები შევლენ.
დე ფაქტო უწყების ცნობით, უზბეკეთის მოქალაქეებმა, რომლებიც აფხაზეთში იმყოფებიან, რუსეთის ე.წ. საელჩოსა და საკონსულოს მიმართეს. ამის შემდეგ რუსულ მხარეს უზბეკეთის საგარეო უწყებამაც მიმართა, რომ საკუთარი მოქალაქეებისთვის მიეცათ სამშობლოში დაბრუნების ნება.
ცნობისთვის, ე.წ. რუსეთ-აფხაზეთის საზღვრის გადალახვა დაუბრკოლებლად მხოლოდ რუსეთის მოქალაქეებსა და აფხაზეთის მცხოვრებლებს შეუძლიათ.