სოჭის სასამართლომ ოკუპირებული აფხაზეთის ე.წ. პრეზიდენტის ასლან ბჟანიას ე.წ. თანაშემწე საერთაშორისო საკითხებში ახრა ავიძბა 10 დღით დააპატიმრა. ამის შესახებ ე.წ. უშიშროების საბჭოს მდივანმა სერგეი შამბამ „სპუტნიკს“ განუცხადა.

მისი თქმით, აფხაზური მხარე სხვადასხვა დონეზე აწარმოებდა მოლაპარაკებებს და იმედოვნებდა, რომ სასამართლო ასეთ გადაწყვეტილებას არ მიღებდა.

მისივე თქმით, სასამართლომ არ გაითვალისწინა, რომ ავიძბას ე.წ. დიპლომატიური სტატუსი გააჩნია.

შამბას თქმით, ახრა ავიძბა თავად გაემგზავრა სოჭის საგამოძიებო ორგანოში იმ ინციდენტში გასარკვევად, რომელიც 7 აგვისტოს მოხდა.

როგორც ცნობილია, ოკუპირებული აფხაზეთის დე ფაქტო პრეზიდენტის ე.წ. მრჩეველი საერთაშორისო საკითხებში ახრა ავიძბა საკონტროლო გამშვებ პუნქტ „ფსოუზე“ ე.წ. აფხაზეთ-რუსეთის საზღვარზე დააკავეს. „ტასს“-ის ინფორმაციით, ოკუპირებულ ტერიტორიაზე სოციალურ ქსელებში გავრცელდა ვიდეომასალა, რომელზეც ჩანს, რომ 7 აგვისტოს ავტომანქანა, რომლის საჭესთან ავიძბა იმყოფებოდა, ე.წ. საკონტროლო გამშვები პუნქტის ჭიშკარი გაიტანა.