„თავისუფალი საქართველოს“ ლიდერები საბურთალოს რაიონში მხარდამჭერებს შეხვდნენ

„თავისუფალი საქართველო“ ერთადერთი პარტიაა, რომელიც პრინციპებს პოლიტიკური ინტუიციის მიხედვით არ იცვლის. ჩვენ ვართ ეროვნული გმირების, ზვიად გამსახურდიასა და მერაბ კოსტავას განვლილი გზის საფუძველზე აღმოცენებული ძალა და ამ მიმართულებას არ გადავუხვევთ“,- ასე მიმართა დღეს საბურთალოს რაიონში შეკრებილ მხარდამჭერებს „თავისუფალი საქართველოს“ ლიდერმა კახა კუკავამ.

მისი თქმით, საქართველოში არებული მძიმე პოლიტიკურ-ეკონომიკური ვითარება არა პოლიტიკოსებმა, არამედ ხალხმა თავად უნდა გამოასწოროს.

„არიან პოლიტიკოსები, რომლებიც ხალხში ნიჰილიზმს თესავენ, როდესაც აცხადებენ, რომ „ქართული ოცნების“ ხელისუფლებიდან გასაშვებად, სააკაშვილის ხელისუფლებაში დაბრუნებაა საჭირო. რბილად რომ ვთქვა, მიკვირს ზოგიერთი ჩემი კოლეგის. განა იმისთვის ვიბრძოდით ყველანი ერთად წლების წინ, რომ სააკაშვილის პოლიტიკური რეინკარნაცია მომხდარიყო? ანდა, როგორ შეიძლება, ხელისუფლებაში დარჩეს ბიძინა ივანიშვილი, როდესაც მისი დაპირებებიდან ოთხის ნაცვლად რვა წელი გავიდა და გასაოცარი საქართველოს მაგივრად, ეკონომიკურად გაღატაკებული, ხოლო პოლიტიკურად უკიდურესად დაუძლურებული ქვეყანა მივიღეთ. აქედან გამომდინარე, ვაცხადებთ, რომ ორპოლუსიანი პოლიტიკური პლატფორმა - „ორი ბოროტებიდან, ნაკლები ბოროტება ავირჩიო“, უნდა დასრულდეს!

არსებობს მესამე გზა, რომელიც არა კაპიტულანტური, არამედ დინების წინააღმდეგობრივია, რომელსაც „თავისუფალი საქართველო“ გთავაზობთ“, - აღნიშნა ამომრჩევლებთან საუბრისას კახა კუკავამ.

შეკრებილ მოსახლეობას სიტყვით მიმართა საბურთალოს მაჟორიტარი დეპუტატობის კანდიდატმა როინ ხიჯაკაძემ. მან მხარდამჭერებს „თავისუფალი საქართველოს“ პროგრამა და დასახული სტრატეგია გააცნო.

„ჩემს ამომრჩევლებს ყოველდღურ რეჟიმში ვხვდები და მათ პოლიტიკურ დაკვეთას შესანიშნავად ვიცნობ. ხალხი ივანიშვილის ხელისუფლების სახლში გაშვებას ითხოვს, თუმცა არა იმის ხარჯზე, რომ სააკაშვილი მობრუნდეს, რომელიც მის მიერ ჩადენილი დანაშაულებების გამო, 8 წლის შემდეგ უხდის ბოდიშს საზოგადოებას.

უკაცრავად, მაგრამ სააკაშვილის ბოდიშის არათუ ხალს, არამედ მისი რეჟიმის მთავარ იდეოლოგებსაც კი არ სჯერათ, რომლებმაც დღეს, პოლიტიკური ელფერი „ევროპული მანტიით“ შეიცვალეს, თუმცა შინაარსობრივად იგივე კონსტრუქციით და შინაგანი კონსტიტუციით დარჩნენ, ვინაიდან ახლავე აცხადებენ, რომ ხელისუფლებაში მოსვლის შემთხვევაში, მათი პოლიტიკური ოპონენტები ციხეში აღმოჩნდებიან“,- განაცხადა ხიჯაკაძემ.

მისი თქმით, საქართველოს პარლამენტში შესვლისთანავე „თავისუფალი საქართველო“ სამი ფუნდამენტური კანონპროექტის მხარდაჭერის ინიციატივით გამოვა.

„ჩვენ, თქვენი მხარდაჭერის იმედი გვაქვს, რის საფუძველზეც „თავისუფალი საქართველო“ საპარლამენტო პარტია გახდება. როგორც კი საკანონმდებლო ორგანოში შევალთ, სამ უმთავრეს კანონპროექტს დავაინიცირებთ. ესენია: კანონი იაფი მედიკამენტების შესახებ, რომელიც მოსახლეობას საშუალებას მისცემს, რომ წამლები 70%-ით იაფად შეიძინოს, მეორე უმთავრესი კანონპროექტი იქნება საბანკო გამოსახლებების აკრძალვის შესახებ, რომლის შედეგადაც ბანკებს ოჯახების გამოსახლება საცხოვრებელი ფართებიდან აეკრძალებათ, ხოლო მესამე კანონპროექტი ადგილობრივი წარმოების მხარდაჭერას შეუწყობს ხელს, რომლის საფუძველზეც, ქართული პროდუქციის განვითარება მაქსიმალურად გაიზრდება, უცხოურ კომპანიებს კი, აღარ მიეცემათ საშუალება, რომ ჩვენს ქვეყანაში უალტერნატივო მონოპოლისტები იყვნენ“, - განაცხადა როინ ხიჯაკაძემ.

„თავისუფალი საქართველოს“ ლიდერები უახლოეს მომავალში ქვემო ქართლის რეგიონს ეწვევიან, სადაც პარტიის მიმდინარე და სამომავლო გეგმებს ადგილობრივ მოსახლეობას გააცნობენ.

ხათუნა ლაგაზიძე - თუ ოპოზიციას რაციონალიზმი კი არა, თვითგადარჩენის ინსტინქტი მაინც შერჩენია, მოუწევთ გაერთიანება იმ საფრთხის წინააღმდეგ, რასაც ასპარეზზე ახალი პოლიტიკური ჯგუფების გამოჩენა ჰქვია
ქართული პრესის მიმოხილვა 07.05.2021
რამაზ საყვარელიძე - ოპოზიციიდან ბევრი შეეცდება სააკაშვილისგან გამიჯვნას და ლიდერის როლის მორგებას, მეეჭვება ეს წარმატებული მცდელობა იყოს, ამ ოპოზიციისთვის რთული იქნება სააკაშვილის დამარცხება
„გაგუას კლინიკაში“ covid 19–ის საწინააღმდეგო ვაქცინაციის კაბინეტი გაიხსნა
ბაქოში ევროპის ჩემპიონატის თასი ჩაიტანეს