ბორჯომის მუნიციპალიტეტის მერიამ კორონავირუსის პრევენციის მიზნით, ბორჯომსა და ბაკურიანში სადეზინფექციო სამუშაოები ჩაატარა. ამის შესახებ ინფორმაციას ბორჯომის მერია ავრცელებს.
დეზინფექცია ჩაუტარდა სავაჭრო ცენტრების, ბანკებისა და იუსტიციის სახლის მიმდებარე ტერიტორიებს, ასევე სკვერებსა და ავტობუსის მოსაცდელებს. მოირეცხა საზოგადოებრივი თავშეყრის ადგილები.
რაც შეეხება დაბა ბაკურიანს, მერიის დასუფთავების სამსახურმა სადეზინფექციო სამუშაოები სასტუმროების, საკარანტინე ზონებისა და სავაჭრო ცენტრების მიმდებარე ტერიტორიებზე ჩაატარა.
,,შეგახსენებთ, რომ ბორჯომის მუნიციპალიტეტის მერიის დასუფთავების სამსახური ბორჯომსა და დაბა ბაკურიანში სადეზინფექციო სამუშაოებს ყოველკვირეულ რეჟიმში ატარებს. სპეციალური ხსნარებით ირეცხება საავტომობილო გზები, საფეხმავლო ბილიკები, ასევე ბანკების, სასურსათო მარკეტების, ბენზინგასამართი სადგურებისა და სამედიცინო დაწესებულების მიმდებარე ტერიტორიები. დეზინფექცია უტარდება, მრავალბინიან საცხოვრებელ სახლებსა და მათ გარე სივრცეებს“, - ნათქვამია ინფორმაციაში.