მოსკოვში, რუსეთის საგარეო საქმეთა მინისტრის სერგეი ლავროვის, სომხეთის და აზერბაიჯანის საგარეო საქმეთა მინისტრებთან ზოგრაბ მნაცაკანიანისა და ჯეიჰუნ ბაირამოვის შეხვედრა საათნახევარზე მეტია მიმდინარეობს. ამის შესახებ რუსული მედია იუწყება.

მოსკოვში მოლაპარაკებების დაწყებასთან ერთად, მოსახლეობას მიმართა აზერბაიჯანის პრეზიდენტმა ილჰამ ალიევმა, რომელმაც განაცხადა, რომ ბაქო ერევანს უკანასკნელ შანსს აძლევს მოლაპარაკებათა ფორმატს დაუბრუნდეს და მთიანი ყარაბაღიდან ჯარი გაიყვანოს.

ალიევმა განაცხადა, რომ თუ სომხეთის საგარეო საქმეთა მინისტრი მოსკოვის შეხვედრაზე იტყვის, რომ ყარაბაღი სომხეთია, ასეთ შემთხვევაში მოლაპარაკებებზე საუბარიც კი შეუძლებელი იქნება.

მისივე თქმით, მოსკოვში მიმდინარე შეხვედრამ ბევრ საკითხს ნათელი უნდა მოჰფინოს და მიღებული უნდა იყოს საბაზისო პრინციპები.

ალიევმა დასძინა, რომ ყარაბაღთან დაკავშირებით სტატუს-კვო აღარ არსებობს.