ხობის მუნიციპალიტეტის სოფელ პირველ მაისში საცხოვრებელ სახლში ხანძარი გაჩნდა
ხობის მუნიციპალიტეტის სოფელ პირველ მაისში საცხოვრებელ სახლში ხანძარი გაჩნდა, შედეგად სახლის მეორე სართული მთლიანად დაიწვა.
სოფელში მერის წარმომადგენლის მარინა ლაგვილავას ინფორმაციით, ხანძრის შედეგად არავინ დაშავებულა.
მისივე თქმით, სახლში 80 წელს გადაცილებული მარტოხელა ქალი ცხოვრობდა.
,,როგორც ვიცი, სახლის მეპატრონემ ეზოში შეგროვილი ფოთლების დაწვა სცადა, რა დროსაც ცეცხლი სახლს მოედო“ , - განაცხადა მარინა ლაგვილავამ.
ადგილზე საგანგებო სიტუაციების მართვის სამსახურის 4 ბრიგადა მუშაობდა. ამ დროისთვის ხანძარი ლიკვიდირებულია.
