ელენე ხოშტარია ვაკეში „ოცნების“ კანდიდატს - ნუ აიღებს ნამუსზე ხელს, ისეთი რამე არ უნდა გავაკეთოთ, რომ მტრებად ვიქცეთ

ვაკის რაიონში „ევროპული საქართველოს“ მაჟორიტარი დეპუტატობის კანდიდატის, ელენე ხოშტარიას განცხადებით, წყნეთში საარჩევნოდ მოსახლეობის დაშინება ხდება. აღნიშნულთან დაკავშირებით, ხოშტარიამ „პალიტრანიუსის“ გადაცემაში „ნიუსრუმი“ ისაუბრა.

ხოშტარიამ აღნიშნა, რომ ადამიანების შეურაცხყოფა, დაშინება ის ზღვარია, რომელიც პოლიტიკოსებმა არ უნდა გადალახონ.

„მე მომდის ინფორმაცია წყნეთიდან, უბრალოდ ადამიანებს არ ვაგდებ ცუდ მდგომარეობაში, ამიტომ ჩუმად ვარ. მინდა ბატონ ნოდარს (ნოდარ ტურძელაძე, ვაკეში „ქართული ოცნების“ მაჟორიტარი კანდიდატი) მივმართო, ნუ აიღებს ნამუსზე ხელს, მე პერსონალურად თავს არ ვესხმი, მაგრამ მისი პასუხისმგებლობაც იქნება, თუ ადამიანებს დააშინებენ. არ იფიქროს, რომ მე ინფორმაცია არ მომდის და ზოგადად, არიან კანდიდატები, რომლებიც მოხვედრილები არიან, არ არიან დიდი პოლიტიკოსები, მაგრამ კარიერისტულად მოხვედრილები არიან და უნდა იცოდნენ, რომ ამ ყველაფრის შემდეგ უნდა გავაგრძელოთ ურთიერთობა და საჯარო პირები უნდა შევეჩვიოთ, რომ სულ ვიქნებით ლუპის ქვეშ და ამ ყველაფერს უნდა შევეგუოთ. ისეთი რამე არ უნდა გავაკეთოთ, რომ მტრებათ ვიქცეთ. ადამიანების შეურაცხყოფა, დაშინება ეს ის ზღვარია, რომელიც არ უნდა გადავლახოთ“, - განაცხადა ხოშტარიამ.