წყალტუბოს საბავშვო ბაგა-ბაღებში სააღმზრდელო პროცესი განახლდა. 21 ბაგა-ბაღში დღეს 555 აღსაზრდელი გამოცხადდა.
„წყალტუბოს მუნიციპალიტეტის საბავშვო ბაღების გაერთიანებაში" აცხადებენ, რომ ყველა საბავშვო ბაღში დაცულია ჯანდაცვის სამინისტროს რეკომენდაციები, განთავსებულია დეზობარიერები, მოწყობილია დაყოვნების და საიზოლაციო სივრცეები.
„ყველა აღსაზრდელს ვულოცავ დღევანდელ დღეს, მნიშვნელოვანია, რომ მაქსიმალურად დაცულია უსაფრთხო გარემო, მიმდინარეობს თერმოსკრინინგი და საბავშვო ბაღები აღჭურვილები არიან სადეზინფექციო საშუალებებით. სრულდება და მკაცრად კონტროლდება ჯანდაცვის მინისტრის ბრძანებით გათვალისწინებული ახალი რეგულაციები, განსაკუთრებით მნიშვნელოვანია ბავშვების მიღების წესი, რომლის ორგანიზებაც თითოეულმა ბაღმა მაღალ დონეზე მოახდინა", - აცხადებს ა(ა)იპ "წყალტუბოს მუნიციპალიტეტის საბავშვო ბაღების გაერთიანების" მმართველი გიორგი იობიძე.